Arabako nekazari, sindikatu eta talde ekologistetatik kideen agerraldian egin dute Gasteizen

AHT Arabako lurretara "urakan gupidagabe bat bezala" datorkiela salatu dute Arabako nekazari eta abeltzainek. Hainbat kuadrillatako udal eta kontzejuetako ordezkariek, Araba Bizirik taldeko kideek, eta UAGA eta Bionekazaritza sindikatuek asteazkenean egindako agerraldian, abiadura handiko trena Gasteiztik Miranda de Ebrora eramateko obrek ekarritako egoeraren berri eman dute.

"Gure lurrak mespretxu instituzional izugarri baten lekuko izan dira" azaldu dute. Izan ere, hainbat pertsonek AHTren alternatiba bat garatu duten arren, "baztertu egin zen inolako lotsarik gabe". Hala, salatu dute Adifek lursailak desjabetzeko "konspiratzea" erabaki duela, nahiz eta zenbait kasutan lursail horiek AHTrako ez baizik harrobi bezela baino ez diren erabiliko.

"Jokabide horrek gure lurraldearekiko axolagabekeria kezkagarria eta bertan bizi garenekiko erabateko mespretxua erakusten du", azaldu dute. Arabako Aldundiaren eta Eusko Jaurlaritzaren "konpromiso falta" ere salatu dute, eta landa-ingurunea babesteko erakutsitako asmoa "kea besterik ez" dela izan diote.

Hori dela-eta, urtarrilaren 26an Ribabellosan Boilur Azoka dela eta egingo duten "erresistentzia ekintza" batera joateko deia luzatu diete kaltetutako herrietako jendeei: "Bada garaia gobernatzen dutenek gogoan izan dezaten benetako garapena ez dela kilometro ordutan neurtzen, baizik eta gure lurrak, herriak eta etorkizuna bizirik mantentzeko gaitasunean".

1.914.399 metro koadro

Arabako nekazaritza eta abeltzaintzarako lurren desjabetzea zein neurritakoa izango den erakusteko datu batzuk ere plazaratu dituzte agerraldi berean. Hala, denera ia bi milioi metro koadro (1.914.399 m²) lur desjabetuko ditu Adifek Araba hegomendebaldeko eremu horietan.

Udalerri batzuetan desjabetutako lur kopurua oso handia izango da, Berantevillan kasu, zeinean 600.000 m²-tik gora geratuko diren Adifen eskutan. Beste toki batzuetan, nekazal lurrez gain lur urbanizagarri ugari ere galduko dute udalerriek, Iruña-Oka eta Gasteiz kasu.