Petronorreko petrolio findegia.

Ekopol ikerketa taldeak "Amalur EIS" tresna garatzen dabil 2022az geroztik, Euskal Herriko eta Europako industriaren inpaktua neurtzeko. Tresna gai da askotariko dimentsioetako analisiak lortzeko, kutsadura datuak, ingurumen inpaktu motak, industria sektoreak eta eremu geografikoak gurutzatuta. Europako erregistroaren informaziotik abiatuta, 30.000 instalazio industrial baino gehiagotan lurzorura, airera eta uretara egiten dituzten isurpenak aztertzen ditu. Europa mailan Alemania da inpaktu gehien eragiten duen herrialdea. Eta tresna horri esker dakigu Bizkaia dela Euskal Herrian kutsadura gehien eragiten duen lurraldea, bolumen osoaren %52rekin. Aztertutako multzoan, gehien kutsatzen duten 25 instalazioetatik hamar daude Bizkaian; eta sailkapenean, atzetik dator Nafarroa, zazpi instalaziorekin –inpaktuaren %23,7– ; gero, Gipuzkoa, bostekin –inpaktuaren %17,8–; Araba, hirurekin –%6,3–; eta Ipar Euskal Herriak %0,5ko inpaktua eragin du –azken horren industria kutsakorrena 55. postuan agertzen baita, metalaren sektorean–.

Petronor enpresarenak dira kutsadura handiena sortzen duten industria instalazioak: guztizkoaren %25. Horrez gain, mineralen industriako sei planta nagusiek %16,9 eragiten dute eta zazpi zentral termikoen, berriz, %17. Zaborraren eta ur lohien kudeaketari ingurumen eraginaren %12,5 dagokio, eta metalen ekoizpenari %7,9.

Ekopolen hitzetan, "lan honek agerian uzten du giza jardueraren monitorizazioak eta kontrolak garrantzi handia duela gure gizartean; ez bakarrik industria instalazio handiei dagokienez, baita askotan oharkabean igaro daitezkeen beste instalazio txikiago batzuei dagokienez ere". Ekopolen asmoa analisia garatzen jarraitzea da, 2025ean zehar beste eremu batzuetara eraman nahi dute ikerketa: integratu gabeko industria txikia, ibilgailuen trafikoa, bizitegi-sektorea, nekazaritza...