Suhiltzaile bat Zarrakazteluko suteko itzaltze lanetan.

Nafarroako Gobernuak uzta lanak debekatu ditu osteguneko 20:00etatik aurrera, datozen egunetan aurreikusita dauden tenperatura altuen ondorioz. Suteak saihestea du helburu debekuak, eta joan diren egunetan egondako neurrien haritik doa: izan ere, Zarrakazteluko sutea dela eta, gobernuak nekazaritza jarduerak debekatu zituen pasa den astean ere. Nafarroako nekazarien eta abeltzainen batasunak (UAGN), agindu forala gaitzetsi du, haien ustez, "bidegabea, neurrigabea eta justifikaziorik gabekoa" da. Hori horrela Nafarroako Gobernuari eskatu diote "meteoalertetan" oinarritutako larrialdi sistemara bueltatzea, eta ez jaustea justifikaziorik gabeko debeku orokorretan.

Ostiralean indarrean sartuko den debekuak Nafarroako Gobernuak onartutako agindu forala du oinarri. Bertan, nekazaritza jarduerak debekatu zituen, sute arriskua zela eta. Nekazaritza sindikatuen presioek eta Zarrakazteluko sutearen egoera hobetzeak, ordea, eragin zuen neurriok malgutzea eta asteazken eta ostegunean nekazaritza lanak baimentzea. Barne kontseilari Amparo Lópezek azaldu du nekazari eta abeltzainekin bildu zela, eta bileretatik apunteak hartu dituela: horren emaitza da abuztuaren 13 eta 14ko malgutasuna, ziurtatu du kontseilariak.

Sutea kontrolpean, Nafarroako Gobernuak larrialdi alerta lehenengo mailara jaitsi du, eta horrek esan nahi du Nafarroako Gobernuko baliabideak erabiliko dituztela soilik suhiltzaileen lanetarako. Kontseilariak azaldu du suhiltzaileek Zarrakazteluko sutean lanean dihardutela, eta ohartarazi du beste sute bat egotea “oso larria” izango litzatekela. Zubiaren bezperan askoz arduratsoagoak izateko eskatu du kontseilariak pertsona asko mugituko direlako, eta jai asko daudelako Nafarroan.