Gladys Eneako pauma bat

Horrelakoak gertatzea parkea eredutzat hartzen duen udal gobernu baten kudeaketan larritzat jo du Eguzkik. Ez dira kasu isolatuak eta konponbiderik ez dela bilatu adierazi du talde ekologistak. Honakoa diote: "Pertsona batzuen errespetu faltari eta Donostiako Udalaren utzikeriaren ondorioz, Gladys Enea parkeko animaliek jasaten duten tratu txarra gero eta nabariagoa da. Lotu gabeko txakurrek basahateak, paumak edota beltxargaren bikotekidea hiltzea ez omen da nahikoa. Pertsonak (pertsona helduak barne) hazkuntza-eremuetan nolanahi sartzea ere ez da nahikoa, arrautzak zapaldu eta animalien atsedena urratu arren. Oraingoan paumei isatsetako lumak kendu dizkiete. Noiz arte jokabide bidegabe hauek? Noiz arte zaintza falta parkean?".

Horren aurrean Donostiako Udalak gertakariak gaitzetsi ditu eta parkearen zaintza eta segurtasuna hobetuko dituela adierazi du. Natura espazioen zaintza "betebehar kolektiboa" dela esan du udalak eta laguntza eskatu du lekukoak aurkitzeko eta erasotzaileak identifikatzeko. Eguzki mesfidati agertu da adierazpen horien aurrean, haien ustez ikustear dago ea benetako neurriak hartuko dituen udalak ala ezerezean geratuko ote diren.