Laborari bakoitzak gutxienez 4.000 euroko kalte-ordainak jasotzeko eskatu du ELBk. Argazkia: EHLG.

Idorteak dakartzan ondorioak gero eta arlo gehiagotan somatzen ari dira; besteak beste, laborantzan ari diren pertsonei eragiten die. Azken astean ELB sindikatuak salatu du kalteei aurre egiteko laguntzak ez direla nahikoak izan: laborarien herena laguntzetatik kanpo geratu da.

Apirilaren 21ean burutu zuen Pirinio Atlantikoetako departamenduko lur eta itsasoen auziak kudeatzen dituen zuzendaritzak lehorteen kalte-ordainak banatzeko prozesua, Kazeta.eus-ek jakinarazi duenez. Bada, ez dituzte jasoko dirulaguntza horiek laborarien herenak: “Idorteak Euskal Herriko etxalde guziak hunkitu ditu eta ez da onargarria Estatuak horietako ainitz bazterrerat uztea”, kritikatu du sindikatuak.

ELBk laguntza eskaini die kaltetuei: helegite txantiloi bat prestatu dute, laborariek bi hilabeteko tartean kexa errazago jarri dezaten, dirulaguntza eskatzeko asmoz. Izan ere, idortearen ondorioek okerrera egin dezaketela aurreikusten du Pirinio Atlantatikoko Idorte Batzordeak, datozen asteetan euri esanguratsurik egin ezean.

Laborarien sindikatuak horren aurrean eskaera zehatza egingo du: laborari guztiek gutxienez 4.000 euroko kalte-ordaina izan dezatela. ELBk baieztatu du laster nekazaritza arloko ordezkariak eta hautetsiak bilkura egingo dutela auzia jorratzeko. Gogorarazi behar da 2022an hainbat neurri hartu zituztela uraren erabilera kontrolatzeko, hala nola ibilgailuak garbitzea eta baratzeak ureztatzea debekatzea.