El Salto hedabideak argitaratu duenez, Radio Euskadiri otsailaren hasieran eskainitako elkarrizketa batean, José Antonio Santano Espainiako Mugikortasun eta Garraio Jasangarriko Estatu idazkariak jakinarazi zuen "aldi baterako lur desjabetzeak" egiteko aukera aztertzen ari zirela, Abiadura Handiko Trenaren (AHT) Nafarroa eta Gipuzkoaren arteko lotura aztertzeko beharrezko azterketa geoteknikoak egiteko.

Horren aurrean, Sakana eta Araba Trenaren Alde herri plataformak ohar baten bidez salatu du Nafarroako Otxobi eta Izurdiaga herrietan AHTrako "baimenik gabeko" lur zundaketak egiten saiatu direla azken egunetan, eta horiek "herritarrek informazioa jasotzeko eta beren ingurunean eragina duten erabakietan parte hartzeko duten eskubidea" urratzen dutela.

Herri plataformak gogorarazi du Iruñea eta Donostia Gasteizen bidez lotzeak, denborari dagokionez hogei minutuko atzerapena  suposatu arren –Ezkio-Itsasoren bidez lotzearekin alderatuz–, "egun dauden trenbide azpiegiturak modernizatzea eta egokitzea" eragingo lukeela: "Trafiko mistorako, merkantzien eta pertsonen trafikorako eta abiadura handiko distantzia luzeko zerbitzurako erabil liteke eskari guztia trenbide-plataforma bakar batekin betetzeko". Gainera, "natura ondarea errespetatuko" lukeela gehitu du.