Etorkizunean proiektu agroekologikoak garatu nahi dituzten pertsonei zuzendutako ikastaroa da hau. “Ekintzailetza eta ekoizpen proiektu txikien sorrera sustatu nahi ditugu, eta horiek eredu kooperatiboan izatea bultzatu nahi dugu”, azaldu du Mikel Roman Larrabe Tokixaneko koordinatzaileak. Bide horretan, eskualdeko beste ekoizpen proiektuekin nahiz eredu horren alde martxan dauden bestelako egitasmoekin elkarlana ere sustatu nahi dute.  

Debagoienako herritarrek lehenetasuna izanen duten arren, ez da eskualdera mugatuko ikastaroaren eskaintza. “Edonor aurkeztu daiteke ikastarora, baina ekoizpen proiektuak martxan nahi dituen jendea lehenetsiko da”, dio. Alde teorikoa eta praktikoa uztartuko dituzte: lehen blokea ideologikoagoa izanen da, edukietan eta kontzeptuetan sakonduko da, hala nola elikadura burujabetzan, agroekologian eta ekonomia sozial eraldatzailean. Luzeagoa izanen den bigarren blokean, berriz, alde agronomikoa landuko da. “Teoria ere egonen da, baina oso praktikoa izanen da bigarren zati hori, eta ikastaroko kideek garatu nahi duten proiektua bideratzen lagunduko da, ekoizpen aldetik, alde ekonomikotik…”. Praktikak eskualdeko baserrietan eginen dituzte ikasleek.

Izen-ematea, ekainaren 15era arte

Datorren ikasturtean izanen da ikastaroa, 2026ko azarotik 2027ko ekainera, eta guztira 390 ordu izanen ditu –160 teoriko eta 230 praktiko–. Izena emateko epea apirilaren 15etik ekainaren 15era izanen da, tokixan.eus/formakuntza webgunean edo tokixan@tokixan.eus helbidera idatzita.

Ikastaroa bukatu eta gero ere ikasleei jarraipena eginen die Tokixan proiektuak, 2027an martxan egotea aurreikusten duten test gunea eta bestelako baliabideak –lurra eskuratzeko nahiz bestelako makinaria– eskainita. “Ekoizle berriei bidea errazteko ildoan lau adar daude: horietako bat da ikastaroa, eta besteak test gunea, bidelaguntza taldea eta baliabide sorta lirateke”, azaldu du koordinatzaileak. Ipar Euskal Herriko Trebatu elkartea izan dute eredu.