Naturopatiaren eta iridiologiaren mundutik iritsi zen Eztizen Agirresarobe Pineda ezkiotarra kosmetika naturalaren mundura: “Hirugarren urtea dut naturopatia eta iridiologia ikasketetan, baina lehenagotik ere egiten nituen ukenduak, kakaoak, eta antzekoak”, azaldu du. Erdi kasualitatez, Santa Luziako azokarako postua jartzea proposatu zion lagun batek duela bi urte, eta hor hasi zen, nolabait, Mimogoxo proiektua izanen zena forma hartzen. Ukenduak, xaboiak eta xanpuak, kremak, olio esentzialak, ezpainetako kakaoak eta antzeko produktuak ekoizten dituzte Ezkioko Goetxe baserrian, eta duela urtebete ingurutik Susana Odriozola Zubizarreta kidea ere berarekin ari da.
2016tik ARGIAn astero esperientzia baten berri ematen du.
Naturopatiako ikastaroetan ikasitakoari aterabide praktikoa emateko modu bat da Mimogoxo proiektua ekoizleentzat. “Lan hau osagarria da guretzat, baina aukera ematen digu teoria praktikarekin uztartzeko”, dio ezkioarrak. Kosmetikaren munduak, orokorrean, ez du gehiegi erakarri izan Agirresarobe, eta jarduera horretara bultzatu duena, benetan, osasunarekiko ikuspegia izan da: “Mimogoxo proiektuaren helburua norbere burua eta ingurukoak mimatzeko produktuak sortzea da, baina, betiere, osasunaren ikuspuntutik. Kosmetika ez dugu ulertzen edertasunari lotuta”. Azaleko azkurak, hanturak edo bestelako gaixotasunak arintzeko helburuz ekoizten dituzte xaboi eta kremak eta tailerrak ere ematen dituzte urtean zehar Mimogoxoko kideek..
Baserrian eraldaketa gunerako txoko bat egokitu dute, nahiz eta azpimarratzen duten azpiegitura edo tresneria handiegirik ez dela behar: “Lapikoak, sua… ez dugu tresna berezirik erabiltzen eraldaketak egiteko”. Produktuak egiteko darabiltzaten lehengaiak hurbilekoak eta ekologikoak izatea lehenesten dute. Argizaria Goierriko erlezainei hartzen diete eta oliba olioa Nafarroatik erosten dute. Aizpea Lasa Muxika diseinatzailearen laguntzarekin, bilgarrietan arreta jarri nahi izan dute: bilgarri gutxi eta ekologikoak darabiltzate produktuetan.
Goierriko Biziola proiektuan, Igartubeitia baserrian, eta Itsasoko Alegi auzoko dendan saltzen dituzte Mimogoxoko produktuak, baina, batez ere, zuzeneko salmenta egiten dute, ahoz aho eta azoketan. “Sendabelarrekiko eta produktu hauekiko interes geroz eta handiagoa dagoela sumatzen dugu, baita jende gaztearen partetik ere”, dio Agirresarobek. Bultzada horretan, Garbiñe Larrea bezalako pertsonen ekarpena nabarmena izan dela dio.
EMAN HARTURAKO:
Zirkuitu ibilbidea 2, Industrialdea 15
20160 Lasarte-Oria. Gipuzkoa. Euskal Herria
bizibaratzea@bizibaratzea.eus
+34 943371545
Bidelagun
cc by-sa
Sareko kide
Ekoedizioaren Institutuko bazkide
