2018an aurkitu zituzten arrainak hilda, Deba ibai ertzean. / Argazkia: Irekia

Bi enpresari epaitu dituzte Deba ibaian zianuroa isurtzeagatik eta milaka arrain hiltzeagatik, Bergarako Oxintxo auzoko ibai-tartean. Bakoitzarentzat urte eta erdiko kartzela zigorra eskatu du Gipuzkoako Fiskaltzak, eta espetxe-zigorraz gain, Gipuzkoako Foru Aldundiak 200.000 euroko kalte ordaina eskatu du. Prozesu judiziala ostegunean amaitu da, eta epaiaren zain daude orain.

Bergara eta Soraluze artean egindako laginketaren arabera, 23.000 loina eta 46.500 txipa baino gehiago hil ziren.

Gipuzkoako Basozainak 2018ko otsailaren 12an ohartu ziren isurketez, ibai ertzean arrainak hilda aurkitu zituztenean. Abisua pasa, eta Uraren Euskal Agentziaren ikerketek ondorioztatu zuten zianuroak hil zituztela arrainak.

Akusatuak galvanizazioa egiten duen lantegi bateko arduradunak dira, eta ikerketen arabera, zianuroa aurkitu zuten haien instalazioetako hainbat lekutan. Jakinarazi dutenez, hiru ur-hobitan zegoen zianuroa, eta hobi horietako bat, gainera, ibaira konektatuta dago. Ertzaintzaren ustez, uholde bat izan zuten lantegian eta horrek eragin zuen zianuroa ibaira isurtzea.

Epaiketan testigantza eman dute enpresako langileek, eta adierazi dute haien ekoizpenetan ez zela zianurorik erabiltzen. Berdina esan du mantentze-lanak egiten dituen arduradunak. Ikerketan parte hartu duen ertzain batek nabarmendu du enpresak ez zuela baimenik ziuanuroa erabiltzeko.