Akerrak baratzan, auzokoak dantzan.

English remedies

Udaberriko loreez zirriborroa neukan egina gaurko artikulurako, naturaren zikloei begira idaztea eta garaian garaikoa ekartzea gustatzen baitzait baina artikulugile daramadan denboran ikasi dut maiz gaia ezin duela norberak aukeratu, biziak ekartzen dituelako beste gai batzuk.

Garbiñe Larrea Iturralde
Garbiñe Larrea Iturralde

Sendabelarrek dakitena liburuaren egilea


2025eko ekainaren 02a
Sendalari bat, karabanatik erremedioak saltzen. T. Merryren 1889ko kromolitografia honek Erresuma Batuko Parlamentuko Autonomiari buruzko Lege Proiektuaren defentsaren satira egiten du.
Mundu bizigarriago bat eta bizitza gozagarriago bat egunero lantzen dugunon komunitateak eusten dugu Bizi Baratzea. Horregatik jartzen ditugu sarean eduki denak libre, Lurrari begiratzen eta entzuten diogunak gero eta gehiago izan gaitezen. Batu komunitatera. EGIN BIZI BARATZEAKOA.

Baserrian bizi den hamar urteko iloba aztoratuta ikusi dut. Ingelesa ikastea ez da gehien maite duena, this is not his cup of tea. Ingelesik ez badu ikasten bizitzan ez dela ezer izango esan dio irakasleak, baserrian sortzen dituen produktuak ezingo dituelako mundu guztian saldu. Hori akaso motibatzaile izango dela pentsatuz ariko zen, ez dut fede txarrik ikusi nahi baina esaldi horren atzean dauden ezjakintasuna, harrokeria, laineza eta arriskua aletu nahi nituzke. Hamar urteko haur batek ez dauka horri erantzuteko argudiorik oraindik baina guk argudio horiek zein diren ba ote dakigun jarri naiz pentsatzen.

Gertukoa, garaikoa eta agrotoxikorik gabe ekoiztua jan behar dugu eta ez Almeriako negutegietatik urte guztian ekarritako tomate hidroponikoa, guregatik eta gure lurrarengatik. Eredu horren atzean dauden karbono aztarna, prezio suntsiketa, esplotazioa eta agrotoxikoen kutsadura ikusarazi beharra dagoela dirudi. Tokiko elikadura sistema jasangarri eta osasuntsua eratu behar dugu eta ez hegazkinez ekarritako elikagaien salerosketa areagotu. Ingelesak baliatu dezake truke komertzial hori, noski, baina larrutik ordainduko du planetak eta gure osasunak. Hau beti izan da garrantzitsua, baina aldaketa klimatikoaren larriagatik gero eta gehiago izango da ezinbestekoa.

Norberaren herrian ekoiztutako ogia herrian bertan jatea normaltzat jotzen dugun bezala barazki eta frutekin ere hori normaltzat jo behar genuke, baina lehen sektorea suntsitzeko egindako politika negargarriek halako ezjakintasuneraino ekarri gaituzte. Ez du balio jatorri izendapenaren urrezko zigiluak asmatzeak egunerokoan atzerrian ekoiztutako kalitate eskaseko elikagai kutsatuak jaten baditugu. Elikagaien globalizazioak ez dakar osasunik, eta akordatu sendabelarrak baino elikagaiak izan beharko lukeela gure lehen botika.

Harrokeria da ingelesa jakiteagatik norbait bizian zerbait izango dela pentsaraztea ere. Hizkuntza handiak inperio eraikitzaileak eta, batez ere, zapaltzaileak izan direla eta badirela erakutsi behar litzaieke haurrei, hori bai. Gure aita zena Andoaingo La Sallen egurrezko erregelarekin jotzen zuen maisuak, azazkalak puskatuz, euskara baztertu eta gaztelera ikas zezan. Gaur egungo ikastetxeetan ez da jotzen baina min ematen da, norberarena baino hizkuntza garrantzitsuagoak badirela ezin baita onez irakatsi.

Bestalde, bizian norbait izan beharra dagoela ere erakusten zaie haurrei, hori edozer izanik ere. Ez dakigu irakasle jende honentzat inor ez izatea baserrian eta baserritik bizitzea ote den. Bertako elikagaiak sustatuz eta kontsumo eredua eraldatuz, elikadura burujabetzaren alde lanean ari diren Elikagunea, Ereindajan, Labore edo Elikaenea eta horien atzean dauden ekoizle guztiak datorzkit burura, besteak beste. Egunerokoan ziurrenik ingelesik erabiltzen ez dutenak baina niretzat arrakastaren eredu direnak. Beraz, dear teacher, respect please.

Gu ere lugorri
Sendabelarrak non bildu galdetuz idazten didate eta bide bazterrei erreparatzeko esan ohi diet. Erromantizismoak kalte egin digu bizitzako esparru askotan eta hemen ere bai, sendabelarrak... (+)
Samariar baltsamoa
Sare sozialen kontra hitz egitea ondo dago, beno, nire inguruan ondo ikusia bezala dago sare sozialek dakartzaten kalteez eta txarkeriez aritzea; progre gelditzen da bat... (+)
Txikori-belarra udaberrian
Udaberri aurreratua ate joka dabilkigu batean eta bestean, tximeletak eta loreak indarrean dabiltza. Ez dakit onerako edo txarrerako, gure etxean otsailean tximeleta artaldean ikustea baino... (+)
Aurtengorako irakurgaiak
Urte berriaren hasieran asmo berritu egiten gara dirudienez, eta egin beharreko zereginen zerrendak egiten ditugu gutako batzuk. Egiteko horien artean irakurtzeko ditudan liburuen zerrenda izaten... (+)
Birika-belarra
Udazken betean gaudela arnas bideei erreparatu beharra daukagu, garai honetan ia gehienok izango baitugu katarroren bat. Hori bakarrik denean gustura, arnasbideetako gaitz larriagoak zeharo gaiztotuta... (+)
gora