Azeribuztanaren formatik edo eitetik harantzago, ukimen berezkoa du, zakarra, lizpaperarenaren antzekoa. Silize kristalei zor die latz punttu hori; bere ehuna eta azala silizez saturatuta daude –landarearen pisu lehorraren %10-15 silizio dioxidoa da–. Uki hori dela eta, erabilera bitxietarako bereizi izan da: zurezko eta metalezko piezak garbitu eta leunduz distira eransteko eta espartzu gisa harrikoa egiteko. Hortik datorkio eztainu-belar izena, gazteleraz ere “estañera”, “yerba restañera”, “escobilla”, “hierba de plata” eta “cola de torneros” diote; katalanez “estanyera”, “aspreta” eta “asprella”; portugesez “lixa-vegetal”; eta ingelesez “scouring rush”. Artisautza lanetan aspalditik ezaguna da, urreztatutako markoak, eskultura polikromatuak eta abar leuntzeko. Erreminta edo lanabesen baten kirtena leundu eta eskura gozatu nahi duzunerako, eduki jasoa azeribuztan lehorra.       

Silizea izateak beste balio eder bat ere eransten dio: sendagaia da. Makina bat erabilera badu animalion osagarri gisa; albaitariari galdetu, adibidez. Txoko honetako landareen zaintzan ere badu zereginik: baratze ekologikoetarako eskuragarri dagoen fungizida naturalik indartsuena da. Silizea beira gogortzen duen eta azazkalak sendo egiten dituen minerala da, eta landareetan, zelula-hormak indartzen ditu, fisikoki zailago egiten ditu onddoen esporak haietan sartzeko. Edozein intsektu izurritek baino uzta gehiago suntsitzen dituzten bi gaixotasunak saihesten laguntzen du: mildiu gorrina eta zurina edo oidioa. Gaitz horiek erasaten dituzte kuiatxoa (Cucurbita pepo var. pepo), arrosa (Rosa spp.), ilarra (Pisum sativum), tomatea (Solanum lycopersicum), mahatsondoa (Vitis vinifera), sagarrondoa (Malus domestica), marrubia (Fragaria x ananassa) eta beste asko.

Heldu bada azeribuztanari isatsetik. Landarea heldua denean, bildu maiatzetik irailera. 200 gramo berde edo 100 lehor erabiliko dugu. Jarri 10 litro euri ur hotzetan, egosi 30 minutuz, irakinaraziz, eta utzi estalita 12 orduz, hozten. Iragazi. Tratatzeko 1:5 proportzioan urardotu (azeribuztan ura litro bat, bost litro euri ur). Ondo busti landarea, goi eta behe. Onddoen esporak hostoaren gainazalean ernetzen dira, eta silizeak bertan egon behar du haiek blokeatzeko. Ihinztatu goizaldean, hostoak lehortu ondoren. Soluzioa hostoan lehortu behar da, babes-geruza ikusezin bat osatuz.
Azeribuztana prebentziorako laguna da. Ez du gaitza sendatuko. Aurrea hartu. Eguraldi epelak eta hezetasuna elkartzen diren ordurako, hasi tratatzen, irail aldera arte. Hamar bat egunetik behin tratatu, eta, eurite baten ondoren, berritu; babes geruza berarekin eramaten du. 
Giro epela eta hezetasuna hemen ditugu. Azti ibili.