Ordenagailua itxi, txankletak jantzi, eguzki-kremaz laztandu. Nora zoaz oporretan? Oporrak egitea nonbaitera joatea dela normalizatu dugu, deskantsuak distantzia behar duelako, diogu. Eta bidaia egitean, turista bilakatuko gara, izendapen aldaketak deserosotasun bat sortzen baldin badigu ere, turista hitza karga iraingarriaz bete dugulako dagoeneko. Turista soft izateko desioan, agian naturara jotzea erabakiko dugu, hiritar turistaren efektu harrapakaria zabalduago dagoelako naturaren turista baino.
Hirietatik kanpo dagoen lurraldeak, berdeago ikusten bada ere, hiriaren dinamika berdinak pairatzen ditu eta ai!, turistifikazio fenomenoaren izurritea iritsi zaio. Landako udalerriek ez dute turismoak ekar dezakeen ekonomiaren aukeratik kanpo gelditu nahi, eta bisitariari aisialdi pack baten eskaintza egiten dio. Erreketan rafting egiteko aukera, basoetan egurrezko bideak eta azalpen-afixak, ibiltzeko irteera-gidatuak, interpretazio-zentro baten bisita, agenda kultural bat, festa ekitaldiak, gastronomia-katak, postaleko herrixken ondare arkitektonikoaren bisita. Landa guneak dauzkan balio salgarriak baso eta landare ingurunea eta landako ondare kulturala dira, batzuetan artifizialki mantendutako herrigune eta paisaiak sortzera arte, ustiapen-balore baitira. Errealitate distortsionatu bat turistaren neurrira egina.
Landa gunera gerturatzen gara esperientziak eta sentsazioak kontsumitzera, izan kirol edo natura bizipen gisara. Lurraldearen ulermen bat erakusten dugu: eszenatoki polit bat ikustera iristen gara, eta ildo beretik, plazera eta entretenimendua ematea eskatuko diogu, eta bertako produktuez tripa betetzea. Landa lurraldearen dimentsio somatikoa berriz, ikusezin eta galduta.
Natura eta landa eremuaz egiten dugun erabilera funtzionalaz sakon aztertzeko, eta turistaren motxilan udako irakurketa bat eramatekoak bazarete, Marc Badal-en Geografías de la ingravidez gomendatzen dizuet. Udaldi on.
EMAN HARTURAKO:
Zirkuitu ibilbidea 2, Industrialdea 15
20160 Lasarte-Oria. Gipuzkoa. Euskal Herria
bizibaratzea@bizibaratzea.eus
+34 943371545
Bidelagun
cc by-sa
Sareko kide
Ekoedizioaren Institutuko bazkide
