Urteak dira ilargi eta landareen agenda argitaratzen duzuela, baina, zer da zehazki agenda hau?

2018an argitaratu genuen lehenbiziko agenda, beraz, pentsa, bederatzigarren urtea da hau. Agenda sinplea da, baina bertan landareekin egin beharreko lanak daude lau ataletan banatuta: baratzea, lore baratzea, fruitu arbolak eta basoa. Hilabete bakoitzeko lanak ere azaltzen dira, baita ilargiaren zikloak eta horien eragina, baratzeko oinarrizko gaiak –nola hasi, txandakaketak, zer-zerekin doan ongi, urteko zikloak, hiztegia…–. Aurten, nobedadea da fruitu arbolei eskaini diegula agenda. Hilabete bakoitzaren hasieran fruitu arbola baten historia kontatzen da, izenak, erabilerak eta bestelako informazioak bildu ditugu.

Zergatik fruitu arbolak?

Jendea eske eta eske ari zen, fruitu arbolen inguruan libururen bat ateratzeko. Ez gara liburura iritsi, baina fruitu arboletara hurbiltzeko modu bat da. Azken urteetan, landareen inguruko gai guztiekin interesa pizten ari da, eta fruitu arbolen kasuan ere sumatu dugu hori. Uste dut jendea pixkanaka horrelako gauzetara bueltatzen ari dela. Gogo berri bat pizten ari da fruta arbolekin, baina tira, egia da hemen beti izan dela kultura hori. Hamabi fruitu arbola aukeratu ditugu, ohikoenak edo: pikua, irasagarra, mertxika, intxaurra, udarea, gerezia, arana, sagarra, gaztaina, kiwia, mizpira eta hurra.

Nori izanen zaio baliagarri agenda liburua?

Landareen zikloak ikasi nahi dituenarentzat oso baliagarri da, bai hasiberrientzat, baina baita gaian sakondu nahi duenarentzat ere. Azkenean, agendan apuntatuta, badakigu zikloek eta beste faktoreek zein eragin duten, noiz ongarritu genuen, lur horretan zein historial dagoen… dena dela, besterik gabe, agenda sinple gisa ere erabil daiteke, baratzearekin loturarik izan gabe.

Baratzeari lotuta, zer apuntatu behar genuke?

Nik uste dena apuntatu behar genukeela: lehenik, zein asmo ditugun, datorren urtean ilarra erein nahi badugu, noiz da ilarra ereiteko sasoia? Egutegian begiratu eta idatzi, horrela aurrez jakinaren gainean gaude. Bestetik, interesgarria da idaztea lur horretan zein lan egiten ditugun, aurretik zer zegoen bertan, baita zein ongarriketa egin dugun, lurrari buelta eman badiogu zein garaitan egin dugun, landarea nondik eskuratu dugun eta zein barietate den… eta, gerora, emaitzak apuntatu ditzakegu. Azkenean, ideia da historial osoa eskura izatea, emaitza onak baditugu hurrengo urtean errepikatzeko, eta bestela, aldatzeko. Ikasteko erarik onena horixe da!