Valentziako Generalitateko presidentearen aurka salaketa jarri du CGT sindikatuak, heriotzak saihesteko neurriak hartu ez izana leporatuta. Hogei bat eragile sozial eta sindikalek berriz, haren dimisioa eskatzeko manifestazioa antolatu dute hiriburuan, datorren larunbaterako.
1980an Irunen jaioa. 2004. urtetik da erredaktore Argian. Gizarte gaiei eta zinemari buruz idatzi ohi du.
CGT: "Mazónen utzikeria medio, ehunka hildako izan dira".
Hemeretzi orriko txostena aurkeztu dio Fiskaltzari CGT sindikatuak, Carlos Arturo Mazón Guixoten aurkako salaketa argudiatzeko. Bertan zehazten dira bai AEMET meteorologia agentziak bai Júcarreko Konfederazio Hidrografikoak egindako ohartarazpenak, DANAk “muturreko arriskua” ekarriko zuela iragarriz, eta nola, paraleloki, Mazónek denboralearen arriskua murriztu zuen, egunean bertan ezeztatu baitzuen alerta hidrologikorik zegoenik eta arratsaldeko seietarako denboralea amaituko zela adierazi baitzuen (ondoren etorri zen okerrena).
CGTk txostenean salatu duenez, “administrazioaren arduragabekeria medio, zehazki administrazio horren buru Carlos Mazónen utzikeria medio, eta herritarrei ohartarazpena atzeratzearen erruz, ehunka hildako izan dira, tartean lantokian edo lantokitik etxera hil diren langile asko eta asko”.
"Oraindik herriak daude, zeinetan jendeak harrapatuta jarraitzen duen, ez delako inor agertu erreskateak egitera"
Larunbatean, manifestazioa
Hilaren 9an, arratsaldeko seietan Valentzia hiriburuko udaletxe aurrean tanta hotzaren aurrean administrazioak izandako “kudeaketa negargarria eta arduragabea” salatzeko eta Mazónen dimisioa eskatzeko manifestazioa deitu dute eragile ugarik. Tartean dira Acció Cultural del País Valencià, Amical de Mauthausen, CNT, Decidim, Escola Valenciana, Valentziako ikasleen guraso federazioa eta Plataforma pel dret a decidir del País Valencià.
“Oraindik herriak daude, zeinetan jendeak harrapatuta jarraitzen duen, ez delako inor agertu erreskateak egitera”, diote antolatzaileek, haserre. Valentziako Gobernura iritsi zelarik PPk Larrialdi Unitatea desegin zuelako, tanta hotzaren eraginaz ez zutelako behar bezala informatu, eta ondoren egiten ari diren gestioa “negargarria” delako, gobernuburuaren dimisioa eskatuko dute. Inkomunikatuta edo harrapatuta jarraitzen duen jendeari buruz ez informatzea ere kritikatu dute antolatzaileek.
Hain justu, astearte arratsaldean eman dute zifra ofiziala: 89 desagertu daude, tanta hotzaren ondorioz. Dena den, gehitu dute jende gehiago egon daitekeela desagertuta, ez badute haien desagerpenaren berri eman. Asteartean emandako datuaren arabera, 211 dira hildakoak.
Beste manifestazio batzuk
Castelló-ko plaza nagusian ere elkarretaratzea deitu dute, hilaren 7 arratsalderako, eta egun berean kontzentrazioa egingo dute Bartzelonako PPren egoitza aurrean.
Bestalde, hilaren 10ean eta 15ean ere manifestazioak deitu dituzte, baina ohartarazi dute eskuin muturreko taldeek deitutako protestak direla azken horiek.
EMAN HARTURAKO:
Zirkuitu ibilbidea 2, Industrialdea 15
20160 Lasarte-Oria. Gipuzkoa. Euskal Herria
bizibaratzea@bizibaratzea.eus
+34 943371545
cc by-sa
Sareko kide
Ekoedizioaren Institutuko bazkide
