Ipar Euskal Herriko eta Europako laborariekin bat egiteko, eta aldarrikapen eta antzerako arazoak dituztela seinalatzeko, protesta egin asmo dute otsailaren 6an.
Espainiako Estatuko laborari elkarteak protesta antolatzen ari dira otsailaren 6rako, eta Arabako eta Nafarroako nekazariek bat egingo dute deialdiarekin. Ipar Euskal Herrian eta Frantzian egin duten modura, traktoreak errepidera ateratzea da asmoa Jon Moraza Ozaeta UAGA sindikatuko kideak ETBri azaldu dioenez.
Sektoreak "ezin" duela gehiago dio UAGAk, eta era berean "desiratzen" daudela kalera irteteko. Izan ere, Ipar Euskal Herriko eta Frantziako laborarien tankerako "baldintza kaskarrak" dituztela seinalatu dute, oro har, araudia Europak ezartzen duelako.
EBren politikak, hiru puntutan
Ipar Euskal Herrian eta Frantzian protestan ikusi ditugun laborariek "koherentzia falta" leporatzen diote Europar Batasunari. Seinalatzen dituzten neurriek, baina, Europako laborari guztiei eragiten diete. Frantziako Estatuan badituzte haien ñabardurak, besteak beste, gobernuaren laguntzak –erregaien kostuak arintzekoak, esaterako– gero eta urriagoak eta berantiarragoak direlako. Horren adibide datu hau: Frantziako Estatuko laborarien %26 da pobreziaren langaren azpian. Eta zifra hori beste honekin gurutza daiteke: bi egunero laborari batek bere buruaz beste egiten du Frantziako Estatuan, MSA laborarien elkartasun kutxaren datuen arabera.
Europako laborariek etsipen amankomun partekatua dute. EBtik kanpoko produktuak "era librean" sartzea da seinalatzen dute puntuetako bat. "Ezin da guri exijitzen dizkiguten ekoizpen baldintzak betetzen ez dituzten atzerriko produktuekin akordio komertzialik itxi", adierazi du errepide mozketetan egunez egun egon den Arnaud Rousseau Frantziako Nekazaritza Ustiategien Sindikatuen Federazioko presidenteak. Duela gutxi esaterako, iazko azaroan, Zeelanda Berriarekin erdietsi zuen akordioa EBk merkatu librean aritzeko.
Landareen osasunerako eta ingurumenerako baldintza "gero eta zorrotzagoak" ezartzen dizkie Europar Batasunak laborariei; hori da muina. "Laborariei hainbeste eskatzea gehitxo da", zioen Rousseauk. Jenofa Berhokoirigoinek artikulu honetan sakonago azaldu zituen xehetasunak.
Etxaldeak, desagertzen
Azken hogei urteetan hamabost milioitik hamar milioira pasa da Europako etxaldeen kopurua eta ondoko 15 urteetan beste 6,4 milioi dira desagertuko, Europako Parlamentuaren The Future of the European Farming Model ikerketaren arabera. Hau da, 35 urtez 11 milioi baserri dira desagertzekoak –bi herenak baino gehiago–, eta Euskal Herriari dagokionez ere joera bera da.
EMAN HARTURAKO:
Zirkuitu ibilbidea 2, Industrialdea 15
20160 Lasarte-Oria. Gipuzkoa. Euskal Herria
bizibaratzea@bizibaratzea.eus
+34 943371545
Ekonomia sozial eraldatzailearen sareko kide da ARGIA (Bizi Baratzea). Informazio burujabetza helburu, egunerokoan gauzak egiteko beste modu batean sinesten dugu.
BIZI BARATZEAko edukiak kopiatu, moldatu, zabaldu eta argitaratzeko libre zara, beti ere, gure egiletza direla aitortzen baduzu eta baldintza beretan egiten baduzu.
