2026ko martxoan Herriko Etxeetako bozak izango dira Ipar Euskal Herrian, eta horiei begira jarri da Bizi mugimendua. Hain zuzen ere, “etorkizun erresiliente eta bizigarria” oraindik posible dela argudiatuta, eta horretarako tokiko mailan ekitea “ezinbestekoa” dela iritzita, hauteskunde zerrendek kontuan izateko hemeretzi neurri dituen Klimaren eta Euskal Herriko biztanleen aldeko ituna aurkeztu du.

Neurriak sei ardatzen inguruan proposatu ditu mugimenduak: bizilekua egokitzea, mugikortasuna, energiarekiko menpekotasuna txikitzea, elikadura, ekonomia birtokiratzea eta ekiteko baliabideak eskuratzea. Sei ardatz horien baitan, denetariko proposamenak aurkeztu ditu mugimenduak, esaterako: etxebizitza berriak sortzea “denentzat eskuragarriak, lur eremu berririk kontsumitu gabe”; bizi eta jarduera eremu nagusiak elkarri lotzea, segurtasunez mugitzeko aukera emateko; “tokikoa, herritarra eta berriztagarria” den energia ekoiztea; elikadura ekoizteko lurrak babestea; tokiko monetaren erabilera orokortzea; eta biztanleei euren bizi ingurunean erabakitzeko gaitasuna ematea, besteak beste.

Neurriok era zorrotz edo lasaiagoan ezartzeko daude diseinatuta, herriaren tamainaren arabera: 2.000 biztanlez azpikoetan “ez hain zorrotzak”, hirixkentzat “gotorragoak”, eta 5.000 biztanlez gorakoetan “anbiziotsuenak”. Horrez gain, neurri bakoitzak bere gain hartzen ditu hauteskunde zerrendek euskal elkargo mailan gauzatzeko ekintzak, Herriko Etxetik elkargoko hautetsi bat, gutxienez, bozkatuko baitute.

Metamorfosi Ekologikoa

Duela bost urte, 2020an, Ipar Euskal Herriko 46 herrik Metamorfosi Ekologikoaren Ituna izenpetu zuten, eta horien jarraipena egin du Bizi mugimenduak; baita 2.000 biztanlez gaindiko beste hamar herrirena ere. Euren ekintzen jarraipena egin du, eta ateratako ondorioen irakurketa aurtengo irailean egingo du, Baionan. Ekimen horrek emango dio hasiera hautetsi zerrenden bilanaren komunikazio kanpainari.

Bizi mugimendua 2013tik ari da Ipar Euskal Herriko herrietako ekintzen jarraipena egiten, eta metamorfosi ekologiko eta sozialaren aldeko gomendioak ematen ditu.