Arabako eguzki energia beste parke bat, Ekian, EAEko handiena.

Bailen Energia enpresak asteartean jaso du Muga egitasmoa eraikitzeko Arabako Industria Administrazioaren Lurralde Ordezkaritzaren baimena; Val proiektuak, berriz, asteazkenean. Eusko Jaurlaritzaren arabera, enpresak hiru urteko epea izango du bi parke fotovoltaikoak eraikitzeko. Instalazio bakoitza 1.680 eguzki panelek osatuko dute, eta guztira megawatt bateko potentzia.

Energia proiektu gehiago Oionen

Bailen Energia enpresak eraikiko dituen bi parke fotovoltaikoez gain, 2006az geroztik EAEn martxan jarriko den lehen parke eolikoa ere Oionen eraikitzen ari dira: hain zuzen, Labrazko parke eolikoak Siemens Gamesak eraikitako zortzi aerosorgailu izango ditu, bakoitzak bost megawatt ekoitziko dituelarik. Beraz, 40 megawatteko potentzia izango du parkeak, eta ia 100 megawatt ekoitziko ditu urtean –30.000 etxe hornitzeko adina–. 

Iberdrolak eta EEE Energiaren Euskal Erakundeak sortutako Aixeindar enpresa da proiektuaren bultzatzailea –Iberdrolak akzioen %60 ditu eta EEEk %40–, eta 59 milioi euroko inbertsioa izango du hastapenetan. 2026ko amaieran martxan jartzea aurreikusten dute bultzatzaileek. Aurrera badoa ere, Oiongo Udala eta herritarrak Labrazako parke eolikoaren aurka agertu dira. Udalak –EH Bildu dago agintean– "behartuta" onartu zuen parke eolikoaren proiektua otsailean, udal batzarrean baztertzeak zein ondorio juridiko izango lituzkeen jakiteko txosten bat egiteko eskatu ondoren.