Trenez bi ordu eta erdian edo denbora gutxiagoan egin daitezkeen Frantziako Estatu barruko bidaiak ezingo dira hegazkinez egin, CO2 isuriak murriztea helburu. Salbuespenak eta baldintzak tarteko, neurriak eraginkortasun errealetik baino gehiago sinbolikotik duela kritikatu du hainbatek.
Astearte honetan sartu da indarrean araudi berria, baina debekatu dituzten hegaldiak praktikan dagoeneko ez zituen eskaintzen Air Francek, 2020an Frantziako Gobernuak dirulaguntza bat eman zionetik pandemian bidaia horiek bertan behera uztearen truke.
Zehazki debekatu diren hegaldiak
Debekatu diren hegaldiek alternatiba behar dute izan trenez: trenek bidaia hori ahalbidetu behar dute bi ordu eta erdian edo denbora gutxiagoan, eta gainera tren bidaia horiek ordutegi egokia izan behar dute, maiztasun ona eta egoki konektatuta egon behar dute; egun berean joan-etorria egin nahi dutenei horretarako aukera errealak eman behar dizkie trenak.
Horrez gain, bidaia luzeagoak egiteko hegaldi batetik bestera lotura gisa funtzionatzen duten hegaldi laburrak ez dira debekatu.
Beraz, praktikan, Paris-Lyon, Paris-Nantes eta Paris-Bordele hegaldiei eragiten die neurriak. Esaterako, Paris-Marsella hegaldiak funtzionatzen jarraituko du, abiadura handiko trenak gutxi gorabehera hiru ordutan egiten duelako bidaia.
Neurri sinbolikoa?
Lotura egiten duten hegaldiak ez debekatu izana, bi ordu eta erdiko muga eta trenari ezarri zaizkion baldintzak tarteko, neurria anbiziotsuagoa izan zitekeela adierazi dute ahots kritikoek, eta praktikan eragin oso txikia izango duela adierazi dute. Kontuak kontu, norabide berean etorkizunean pauso gehiago emateko lehen urratsa izan daitekeela ere azpimarratu du batek baino gehiagok, CO2 isuriak murriztea helburu.
EMAN HARTURAKO:
Zirkuitu ibilbidea 2, Industrialdea 15
20160 Lasarte-Oria. Gipuzkoa. Euskal Herria
bizibaratzea@bizibaratzea.eus
+34 943371545
Ekonomia sozial eraldatzailearen sareko kide da ARGIA (Bizi Baratzea). Informazio burujabetza helburu, egunerokoan gauzak egiteko beste modu batean sinesten dugu.
BIZI BARATZEAko edukiak kopiatu, moldatu, zabaldu eta argitaratzeko libre zara, beti ere, gure egiletza direla aitortzen baduzu eta baldintza beretan egiten baduzu.
