Suhiltzaileen helikoptero bat ura botatzen Nea Makri inguruan, Atenas ekialdean. Argazkia: Reuters

Grezian piztutako baso-sute baten ondorioz, 50.000 pertsona baino gehiago ebakuatu dituzte, eta gutxienez 10.000 hektarea kiskali dira, EFEk informatu duenez. Sutea Varnavasen hasi zen, Atenasetik 40 kilometro ingurura, baina bizkor hedatu da: hiriburuaren erdigunetik hamahiru kilometrora dauden Vrilissia eta Chalandri hiriguneetako dozenaka etxe eta enpresa kiskali dira. Suhiltzaileen zerbitzuko iturri batek BBCri adierazi dio Vrilissian pertsona bat hil dela suteen ondorioz, eta haren gorpua –emakume batena dela uste dute– denda baten barruan aurkitu dutela.

Keak Atenas estali du, eta ia 80 pertsona ospitaleratu dituzte arnasketa arazoengatik, Le Monderen arabera. “Guztira 702 suhiltzaile ari dira lanean, 27 baso-komandoetako talde, 199 ibilgailu eta boluntarioen laguntzarekin, eta Babes Zibileko erakunde guztien laguntzarekin”, zabaldu du Greziako Babes Zibilak ohar baten bitartez. Agintariek esan dute suteak 40 lekutan zeudela astelehenean, eta zenbait gunetan 25 metrorainoko sugarrak ikusi dituzte.

Europar Batasunari laguntza

Greziako Gobernuak laguntza eskatu dio Europar Batasunari (EB) suteei aurre egiteko. Europako Batzordeko presidente Ursula von der Leyenek sare sozialen bitartez adierazi du EBk “bere flotaren laguntza” bidali duela, hala nola Italiako bi hegazkin, Frantziako helikoptero bat, eta Txekiar Errepublikako eta Errumaniako suteen aurkako taldeak. Hala ere, Frantziako Barne Ministro Gérald Darmanin-ek esan duenez, Frantziak 180 suhiltzaile, 55 kamioi eta helikoptero bat bidali ditu suteak itzaltzeko, eta Turkiak adierazi du bi hegazkin eta helikoptero bat bidaliko dituela, La Vanguardiak jaso duenez. Suhiltzaile zerbitzuen bozeramaile Vassilios Vathrakogiannis-ek adierazi du ez dagoela su aktiborik ipar-ekialdeko Atika eskualdean –Atenaseko zatiak barne–, baina “su aktibo asko lokalizatuta” daudela, batez ere Marathon eta Penteli hirien inguruan.

Greziak inoizko udarik beroena

Vathrakogiannis-ek astelehen gauean zabaldutako adierazpen baten bitartez esan du sute berrietako baldintzak oraindik ere arriskutsuak direla, ez bakarrik asteartean, baita astean zehar ere. “Haizeak oso biziak dira, eta ez digute laguntzen lurraren morfologiak eta landaretzak, batez ere azkar erretzen diren pinuak eta gorostiak", esan dio EFEri suhiltzaileen bozeramaile batek. Agintariek adierazi dute ostegunera arte alerta gorenean daudela suteak direla eta.

Aurreikuspenen arabera, Greziak inoizko udarik beroena izan daiteke. Atenasko behatokiko ikerketa-zuzendari Kostas Lagouvardos-en arabera, Greziak inoiz erregistratutako negurik beroena bizi du aurten, euri gutxiko edo euririk gabeko aldi luzeak, eta uztailik beroena 1960an erregistroak gordetzen hasi zirenetik, El Paísek jaso duenez. Uztailean, batez besteko tenperatura 27 gradu zentigradukoa izan zen, 1991tik 2020ra bitarteko hilabete bereko batez besteko balioa baino ia hiru gradu handiagoa.

Meteorologoek eta babes zibilak ohartarazpenak egin zituzten

Greziako meteorologoek eta babes zibilak ohartarazi zuten asteburuan, Egeo itsasoaren inguruan, suterik txikiena sute handi bihur zitekeela minutu gutxiren buruan. Horregatik, Greziako Babes Zibilak debekatu egin zuen hainbat jarduera egitea, hala nola belar lehorra erretzea, txinpartak sortzen dituzten makinak erabiltzea edota parrilla aire zabalean egitea.

Atenaseko kanpoaldeko suteak udan, ohikoak azken urteetan

Nahiz eta Atenaseko kanpoaldeko suteak ohikoak izan azken urteetan udan, lehen aldia da sua hiriburuaren erdigunetik hain gertu zabaltzen dena, EFEk informatu duenez. Le Mondek Asimina izeneko greziarrarekin hitz egin du –uneotan suteak dauden inguruko bizilaguna da emakumea –, eta 2018ko uztaileko suteak aipatu ditu, non 100 pertsona inguru hil ziren, “bere bizitzako esperientziarik traumatikoena”. “Lehen, zalantza izan zitekeen norberaren etxea edo denda uztean, azken finean bizitza baten inbertsioa da. Baina orain irudi tragiko horiek buruan ditugu, senideak eta bezeroak ezagutzen ditugu, familiako kideak galdu dituztenak, eta ezin dugu ahaztu. Ezin dugu arrisku gehiago hartu”, adierazi du emakumeak.