Parke bakoitzak hirurogei hektarea izango ditu, eta 32 milioi euroko aurrekontua du proiektuak. Ingurumen eta baimen teknikoak berretsita, egitasmoari hirigintza baimena baino ez zaio falta eraikitzeari ekiteko.
Parke fotovoltaiko bat.
Vitoria Solar 1 Arabako Gasteiz eta Arratzua-Ubarrundia udalerrietan egongo da, eta Vitoria Solar 2 Gasteizen eta Burgun . Bakoitzak 90.000 panel fotovoltaiko izango ditu, eta bertan bildutako energia Arabako hiriburuan egongo den azpiestazio batera bidaliko dute lurpeko kable baten bidez.
El Diario egunkariak jaso duenez, Indarberri enpresa publiko-pribatua da egitasmoaren sustatzailea: Solaria enpresa pribatu energetikoak partaidetzaren %70 ditu eta Energiaren Euskal Erakunde publikoak, berriz, %30. Bi parke fotovoltaikoak eraikitzeko batu ziren biak.
2023. urtearen amaieran UAGA Arabako Nekazarien Elkarteko hainbat laborarik Berria egunkariari salatu zioten Solaria enpresaren jazarpena, laborantza lurrak saldu zitzaten. Laborarien arabera, Solariak "diru kopuru erraldoiak" eta "xantaia" erabiltzen ari zen horretarako. Horietako batek adierazi zuen lurrak alokairuan jartzearen truke 1.500 euro eskaini zizkiotela urtean hektareako, 40 urtez, eta salduz gero 25.000 euro hektareako.
Oiongo Udala, "behartuta"
Bi hamarkadetako etenaldiaren ostean, Oiongo Labraza herrian eraikiko dute Arabako hurrengo parke eolikoa. Oiongo Udalak —EH Bildu du buru— osteguneko arratsaldeko osoko bilkuran berretsi zuen egitasmoa onartzeko baimena, legez onartzera "behartuta" zeudela argudiatuta. Izan ere, eraikitzen hasteko behar diren baldintza guztiak betetzen ditu proiektuak: ingurumen inpaktuari buruzko adierazpena, aurretiazko administrazio baimena eta eraikitzeko administrazio baimena.
Arabako Mendiak Aske taldeak ARGIAra bidalitako iritzi artikuluan Oiongo Udalaren "maniobra legal eta alderdikoiak" gaitzetsi ditu. Taldearen arabera, bazeuden nahikoa arrazoi parke eolikoa eraikitzeko egitasmoa gelditzeko: esaterako, izapidetzak jasan dituen "irregulartasunak", kasuaren "judizializazioa", eta garrantzitsuena, Labrazko herriaren "ezezko irmoa". Horrela, taldearen ustez Oiongo Udalak legez legitimatu du tramitazioan "irregulartasun nabarmenak" dituen megaproiektu energetikoa.
EMAN HARTURAKO:
Zirkuitu ibilbidea 2, Industrialdea 15
20160 Lasarte-Oria. Gipuzkoa. Euskal Herria
bizibaratzea@bizibaratzea.eus
+34 943371545
Bidelagun
cc by-sa
Sareko kide
Ekoedizioaren Institutuko bazkide
