Espainiako Gobernuko Trantsizio Ekologikorako eta Erronka Demokratikorako Ministerioak atzera bota du Statkraf multinazionalak Araba eta Gipuzkoa artean eraiki nahi zuen Itsaraz parke eolikoa.
Nafarroako Erreniegako parke eolikoa.
Ministerioak ez du onartu Statkraftek aurkeztutako ingurumen-eragineko txostena, uste duelako proiektuak kalte esanguratsuak eragin ditzakeela inguruko hegaztietan eta faunan, hau da, Aramaio eta Eskoriatza arteko parajeetan. Urkiolako parkea ere gertu dago eta harako ere kaltegarria izan daitekeela deritzo, eta gainera hark babes bereziko eremu izendapena du.
Aipatu bi herrien artean zortzi haize-errota jarri nahi zituen Statkraftek, bakoitza 7,55 megavatiokoak eta gehienezko 201 metroko alturakoak. Aparailuen hegalek 2,32 hektareako azalera hartuko lukete martxan aritzean. Sortutako energia ateratzeko bi sare eraikitzeko asmoa zegoen: bata 30 kilovatiokoa eta lurrazpikoa, Aramaioraino; eta bestea 132 kilovatiokoa, airean –13 kilometro eta 48 poste– eta lur azpian –481 metro– eraikitakoa, Abadinoraino.
Espainiako Gobernuaren Aldizkari Ofizialaren bidez emandako azalpenetan, ministerioak dio inguru horretan hegazti harrapakari asko dagoela, besteak beste sai arrea eta sai zuria, eta babestutako beste hegazti askok hartzen duela atsedena han eta bertan elikatzen dela, eta proiektuak ez duela bermatzen haien babesa.
Statckraftek bere harridura erakutsi du ministerioaren erabakiaren aurrean, bai beste toki batzuetan onartu dizkioten parkeetan antzeko baldintzak daudelako, bai aldez aurretik hainbat erakunderen baimena lortu duelako, hala nola Gipuzkoako eta Arabako diputazioena.
Bizkaiko Aldundia izan da ingurumen-eraginari ezezkoa eman dion beste erakundea. Haren ustez, proiektuak bete-betean eragiten dio sai zuriari eta, gainera, ez dago modurik eragin hori zuzentzeko, beraz, onartu ezinekoa da. Ministerioak ere, azkenean, antzera pentsatzen du eta horregatik “zuhurtasun printzipioaren alde” egiten du. 50 megavatiotik gorako poligonoa denez, azken hitza Espainiako Gobernuarena da, eta hortik etorri zaio ezetza multinazionalari.
Norvegiako multinazionalak aurrera jarraitzen du Gipuzkoan duen Piaspeko proiektuarekin. Azpeitia, Zestoa eta Errezileko udalerriak hartzen ditu, 33 megavatioko bost aerosorgailu aurreikusten ditu eta herritarren oposizio handia du.
EMAN HARTURAKO:
Zirkuitu ibilbidea 2, Industrialdea 15
20160 Lasarte-Oria. Gipuzkoa. Euskal Herria
bizibaratzea@bizibaratzea.eus
+34 943371545
Bidelagun
cc by-sa
Sareko kide
Ekoedizioaren Institutuko bazkide
