Getariako Gaztetape hondartza.

Bizkaia, Araba eta Gipuzkoako biztanleriaren %60a kostaldeko udalerrietan bizi da, beraz itsasoaren aldaketa orok eragin zuzena izango du jende askoren bizitzetan. 2050. urterako itsasoa 26 zentimetrotan igoko dela aurreikusten du Greenpeace talde ekologistak. Igoera horrek eragin handia izango luke Bizkaia eta Gipuzkoako hainbat hondartzatan, azalera galduko baitute. 

Metro gehien galduko lituzketen hondartzak Hondarribiakoa eta Ereaga (Getxo) dira, 20-30 metro galduko baitituzte. Honako hauek 10 eta 20 metro artean galduko lituzkete: Zurriola (Donostia), Zarauzkoa, Santiago (Zumaia), Itzurun (Zumaia), Debakoa, Ondarbeltz (Mutriku), Ondar Gain (Mutriku), Karraspio (Mendexa), Isuntza (Lekeitio), Plentziakoa, Muriola (Barrika), Arriatera (Sopela), Barinatxe (Getxo), Azkorri (Getxo) eta Arena (Zierbena eta Muskiz).

Hondartzak galtzeko eta uholdeak egoteko arriskua dago

Gaztetape eta Muriolako hondartzen kasuan itsasoaren igoerak hondartzak erabat desagerraraziko lituzke, Greenpeaceren estimazioen arabera. Aipatutako hainbat hondartzek klima larrialdiaren eragina dagoeneko pairatzen ari direla adierazi du Greenpeacek. Adibidez, Zarauzko hondartzak, Bizkaian eta Gipuzkoan azalera handiena daukanak, kalte handiak pairatu zituen Christine ekaitzarekin 2014an. Egoeraren aurrean Zarauzko Udalak itsas pasealekua 50 zentimetrotan igoko du 1,5 milioi euro gastatuta.

Txostenaren arabera uholde arrisku handien izango lukeen udalerria Murueta izango litzateke, azaleraren %26a arriskuan baitago. Han kokatu nahi dute Guggenheim museoaren bigarren egoitza, "horrek zentzugabekeria handiagoa ematen dio proiektu polemiko" horri, Greenpeaceren ustez. Uholdeak izateko arriskua dago Plentzian, Bermeoko kostaldean, Mundakan, Urdaibai inguruan, Ean, Lekeitioko kostaldean, Ondarroan, Deban, Zumaian, Getarian, Orion eta Irunen.