Arratzua-Ubarrundiako udaletxea, Durana herrian.

Arratzua-Ubarrundiako EH Bilduko hiru zinegotziek dimisioa eman dute asteazkenean, Arabako udalerri horretan Solaria enpresak aurrera eraman nahi duen Vitoria Solar 1 proiektu fotovoltaikoa gelditzeko ezintasunak sorturiko "frustrazioak" eraginda.

Ohar baten bidez azaldu dute udal gobernuan sartu zirenetik –EH Bilduko hiru zinegotzik, EAJko beste hiruk eta Goazen taldeko beste hiruk osatzen dute–, Solariaren proiektua gelditzeko lan egin dutela, "bai kaletik, bai erakundetik".  Baina udalez gaindiko erakundeek bultzatzen dituzten halako proiektuekin "eskuak lotuta" dituztela diote, eta Eusko Jaurlaritza aldi berean "parte eta epaile" dela.

"Egoera horren aurrean ez gara legegintzaldia amaitzeko indarrez sentitzen", diote, eta euren dimisioarekin oharatarazi nahi izan dute "gauzak ezin direla horrela egin".

Proiektu honi ez!: "Egoera kafkiarra da"

Proiektu honi ez! plataformak komunikatua zabaldu du, dimisioen inguruko bere iritzia eman eta hainbat salaketa egiteko. 

Azaldu duenez, Vitoria Solar 1 proiektu fovoltaikoaren Plan Berezia ez onartzea eskatzeko udalbatzan aurkeztutako mozioa, komisio batean landu zen aurretik, eta EH Bilduko zinegotziek babesa eman zioten, baina gero ez ziren bozketara agertu. Plataforma horren esanetan EH Bilduko "zuzendaritza politikoak bere irizpidea inposatu" du, eta horrek egoera "kafkiarra" sortu du, zinegotzien dimisioarekin.