ELB sindikatua.

Laurent Duplomb Frantziako senatariaren lege proposamena salatu du ELBk prentsa ohar bidez. Parlamentariek "laborarien lana erraztu nahi dutela diote", adierazi du sindikatuak, baina funtsean "laborantzaren eredu industrial eta produktibista baten zerbitzura den lege korporatiboa" sinatu nahi dutela. "Giza osasunerako eta ingurumenerako" pestizida horien "kaltegarritasuna zientifikoki frogatuta" dago, ziurtatu du.

Legeak instalazio kopuruaren muga aldatu nahi duela ere salatu du sindikatuak. Modu horretan etekin ekonomikoak handituko direla uste du, baina ohartarazi du enpresa handiak liratekeela onuradunak eta nekazariak kaltetuak. Hori dela eta ELBk dei egin zien euskal diputatuei lege emendakinaren kontra egitera. Ezkerreko parlamentariek hainbat zuzenketa aurkeztu dituzte, baina "txostengileek instituzioak desbideratu dituzte gaitzespen mozio bat aurkeztuz, legea batzorde misto paritarioan bozkatua izan dadin, gehiengoa eskuin eta eskuin muturreko parlamentariek osatua".

Kazetak argitaratu duenez, ikasle batek Duplomb Legea geldiarazteko sinadura bilketa bultzatu du, "langileentzako, herritarrentzako, ingurumenerako, ekonomiarako eta gizarte osorako" arriskutsua delako. Hamabi egunetan 1.6 milioi sinadura baino gehiago lortu ditu, eta eskaerek 500.000 sinadura lortu behar dituzte Asanblada Nazionalean eztabaidatuak izateko aukera izan dezaten. Legebiltzarraren jarduera bueltatzen denean helduko diote gaiari, urrian.