Nafarroako Gobernuko Ingurumen zuzendariak atzera bota du Goñin eta Etxaurin jarri nahi zituzten zortzi haize erroten proiektua. Enigma Green Power eta Savanna Power Solar enpresen egitasmoa zen, baina ingurumenean izango duen inpaktua dela eta geldiarazi dute proiektua. Asteartean Nafarroako Aldizkari Ofizialean argitaratu dutenaren arabera, ebazpenari ezingo zaio helegiterik jarri.

Proiektua gelditzeko beharrezko izan dira hainbat elkarte ekologistak, udalek eta norbanakok aurkeztutako alegazioak. Ebazpenaren arabera, garrantzi ekologiko handiko lekuetan eraiki nahi zuten, Hegaztientzako Babes Bereziko Etxauriko Gunetik eta Kontserbazio Bereziko Urbasa eta Andiako Gunetik gertu. Ondorioz “bideraezintzat” jo du gobernuak proiektua.

Adierazi dutenez, eremu garrantzizkoa da hegazti eta saguzar askorentzat, besteak beste, miru gorriarentzat, sai arrearentzat eta ugatzentzat. Kolisio arriskua daukate arriskuan diren animalia horiek. Era berean, zortzi errotak eraiki nahi zituzten lekua landarediaz betetako eremu handia da eta gutxienez bi hektarea landare kaltetuko lirateke, tartean 1,4 hektarea pagadi.

Estitxu Eizagirre ARGIAn Hego Euskal Herrian egin nahi diren parke eolikoek biodibertsitatean duten inpaktuaz aritu zen artikulu honetan.