Ekologistak Martxanek herritarrengandik hainbat salaketa jaso ditu aste honetan, Deustu auzoko Lehendakari Agirre etorbidean 128 zumar ebaki dituztelako. Talde ekologistak jakinarazi duenez, Bilboko beste hainbat auzotan ere ebaki dituzte zuhaitzak azken hilabeteetan: Santutxun, Txurdinagan, Indautxun eta Basurtun. Bilboko udalak "segurtasun arrazoiak" argudiatu ditu Deustuko zumarrak kentzeko eta horien ordez asiar jatorriko 125 astigar hiruhortz sartuko dituela iragarri du. Ekologistak Martxanek zalantzan jarri ditu udalaren argudioak eta bertako espezieak landatzeko eskatu dio.
Deustuko Lehendakari Agirre etorbideko zumarrak lurrean. Argazkia: @Biziosona.
Txio bidez salatu zuen @Biziosona erabiltzaileak abenduaren 26an kalean aurkitu zuen egoera hau:
En Lehendakari Aguirre se está procediendo a sustituir el arbolado aprovechando la obra de renovación de la calle. Estaban en mal estado, sobre todo las raíces, así que, obedece a un motivo de seguridad
— Bilbao [Udala - Ayuntamiento] (@bilbao_udala) December 27, 2022
Udalak Twitter sare sozialean duen kontu ofizialaren bidez eranzun zion: “Agirre Lehendakariaren etorbidean zuhaiztia aldatzen ari dira kalea berritzeko lanak aprobetxatuz. Egoera txarrean zeuden, sustraiak batez ere, beraz, segurtasun arrazoi bat da”.
Bilboko Udalak Agirre Lehendakaria etorbidea osorik berritzeko proiektuaz emandako informazioan azaldua duenez, "128 zumar kendu eta 125 ale berri landatuko dira. Zuhaitz berrietarako hautatutako espeziea astigar tridentea da. Balio estetiko handiko espeziea da, hiri-ingurunearekin interferentzia gutxiago sortzen ditu, eta gehienez 9 eta 10 metro arteko altuera hartzen du".
Hala ere, Ekologistak Martxanek zalantzan jarri du kale horretan zeuden “zuhaitz guztiak gaixo” ote zeuden, eta gaineratu du “orain ezinezkoa izango litzatekeela hau egiaztatzea”, eta mozketa honek “gehiago erantzuten diola kalea berritzeari zuhaitzen osasunari baino”.
Ekologistak Martxan-ek adierazi du "hobe daitekeela" zumarren ordez ezarri nahi dituzten astigar hiruhortzen planteamendua: "Egokiena da hasieran zegoena baino zuhaitz gehiago jartzea, zuhaizti-uraldi baten aldeko apustua eginez, freskura eta itzala ekarriko dituena klima-aldaketaren testuinguruan, eta, horrela, espezie autoktonoak berreskuratzea”. Oroitarazi du astigar hiruhortza jatorri asiarrekoa dela eta Bilboko kaleetan espezie autoktonoen adibide ugari daudela: ezkia Kale Nagusian eta Sabino Aranan edo landako astigarra.
Hori dela eta, erakunde ekologistak Bilboko Udalari eskatu dio “espezie autoktonoen landaketa sustatzeko” eta kaleak berritzeko edo egokitzeko planetan “zuhaitzen presentzia nabarmena duten eremuak jartzeko, eremu bakoitzeko beharretara ondoen egokitzen den espezie autoktonoa bilatuz”.
@amaiur erabiltzaileak Santutxuko Zumalakarregi etorbideko argazkia zabaldu du, bertan ere zuhaitzak ebaki dituztela erakutsiz:
Zumalakarregi etorbidea. @bilbao_udala pic.twitter.com/IekynlamXc
— amaiur (@amaiur89242632) December 27, 2022
EMAN HARTURAKO:
Zirkuitu ibilbidea 2, Industrialdea 15
20160 Lasarte-Oria. Gipuzkoa. Euskal Herria
bizibaratzea@bizibaratzea.eus
+34 943371545
cc by-sa
Sareko kide
Ekoedizioaren Institutuko bazkide
