Bizi-baratzea

Jakoba Errekondoren kontsultategia

Bizi Baratzea gida liburua aplikagarria al da Ebro ibaiko zonaldean?
2020-01-04 00:00 | Kontxi

Egun on,

Larunbatero saiatzen naiz Jakoba Errekondoren landaberri programa bikaina entzuten. Nahiko berria naiz gai hauetan, eta aurten Olentzerok “Bizi Baratzea” liburua ekarri dit. Nire baratzean bere aholkuak kontuan hartzen saiatzen naiz. Orain "Landareak lantzen” gida liburua erostea pentsatzen ari naiz, baina, honako zalantza sortu zait gida liburu hau aplikagarria al da Ebro ibaiko zonalde honetan?

Baratza dudan soroaren altitudea 400 metro ingrurukoa da eta Wikipedian honako hau hartu dut:

"Vianak Ebro ibaiko depresiogunearen berezko klima mediterraneo-kontinentala dauka. Neguak hotzak, udak beroak, aldaketa termiko handiak, eta euriak nahiko eskasak eta irregularrak izaten dira (batez ere udaberrian eta udazkenean egiten du euria). Urteko batez besteko tenperatura 10 eta 13 gradu artekoa eta prezipitazioak 500” ingurukoak diot nik.

Zuen erantzunaren zain, agur bero bat.

Kontxi (baratze zalea)

1 erantzun | Zeuk erantzun

Jakoba Errekondo-ren erantzuna
2020-01-10 11:12

Kaixo Kontxi,

Zalantzarik gabe balio du.

Euskaraz ateratzen ditugun liburuak Euskal Herri osorako pentsatuz eginak daude.

LANDAREAK LANTZEN 2020 liburu-agendako 150-151 orrialdeetan ikusten baduzu, urteko egutegia dago. Bertan azaltzen da barazki bakoitza erein, landatu eta uzta biltzeko sasoia. Sasoi hori zabala da beti, gehienetan gutxienez bi hilabete. Zeure baratzera aplikatzen zeuk ikasi beharko duzu, eta bereziki horretarako tresna egokia da agenda. Urtero idatziz eta emaitzaren jarraipena eginez ikasteko da.

Baratzea zein lurraldetan dagoen bezain garrantzitsua da lurralde horretan nola kukatua dagoen: ospela, egutera, orientazioa, bailara, mendi-mazela, gaina…

Animatu eta erakutsiko diguzu.

Ondo izan

Jakoba