Euria egiteko hobe da bi haizeren borroka; ez santu guztiekin erreguka

Bizi baratzearen plaza

Goiener berriztagarriak
Energia berriztagarriak sortzeko eta kontsumitzeko asmoarekin eratutako irabazi asmorik gabeko kooperatiba

Goienerrek sentsibilizazio kanpaina bat egingo du Pobrezia Energetikoaren Aurkako Astean

2025-02-14 07:00

Otsailaren 17tik 23rakoa Pobrezia Energetikoari Aurre Egiteko Europako Astea izango da. Ekimen honen helburua pobrezia energetikoaren arazoa mahai gainean jartzea da eta baita erakunde publikoek (Europa mailakoek zein tokian tokikoek) duten erantzukizunaz hausnartzea ere.

7 egun horietan, Goienerren ere sentsibilizazio-kanpaina berezi bat jarriko dugu abian, sare sozialetan, egunero, pobrezia energetikoari lotutako argitalpenak egiteko. Ekimen honen bitartez, gure asmoa herritarrak egoeraz ohartaraztea, kontzientzia piztea eta irtenbide kolektiboak proposatzea da.

Zer da pobrezia energetikoa?

Norbait energia-pobrezia egoeran dagoela esan genezake, alde batetik, ez denean bere behar energetikoak ase eta ordaintzeko gauza edo, bestetik, bere diru-sarreren zati handi bat energia-faktura ordaintzera bideratu behar duenean. Arazo konplexua da, eta hamaika aurpegi ditu. 


Eurostaten datuen arabera, Europar Batasunean, 10 herritarretik 1ek ezin zuen iaz etxea behar bezala berotu (Espainiar estatuko azken datuen arabera, herritarren %17k). Agerikoa da, beraz, ezinbestekoa dela pobrezia energetikoari aurre egingo dioten politika berriak ezartzea, lehenbailehen.

Sentsibilizazio kanpaina berezia sareetan

Azken urteetan, Goienerren ekimen eta proiektu ugari jarri ditugu martxan pobrezia energetikoari aurre egiteko, eta hasieratik baliatu dugu gure ezagutza herritarrei laguntzeko (tailerretan fakturak ulertzen eta optimizatzen erakutsiz, hornidurak hobetuz, etxeetako efizientzia hobetzen lagunduz…). 

Sare sozialetako kanpaina berezi honekin beste urrats bat ematea dugu helburu, otsailaren 17tik 23ra bitarte. Goienerren Mastodon, Telegram, Instagram eta LinkedIn kanaletan jarraitu gaitzakezu.

atzera
gora