• Herri Bideak Kate Barik, Lamiako Txopoeta Bizirik, Plataforma en defensa de la Vega de Lamiako eta Ekologistak Martxan elkarteek eremu berezi horren birnaturalizazioa eskatzen dute

• Gaur, otsailak 2, “Hezeguneen Munduko Eguna” ospatzen da, ekosistema horiek kontserbatzearen garrantzia nabarmentzeko

1997tik urtero bezala, otsailaren 2an “Hezeguneen Munduko Eguna” ospatzen da. Efemeride honek bizitzarako eta biodibertsitaterako ezinbestekoak diren ekosistema horiek kontserbatzearen garrantzia azpimarratu eta fokua jarri nahi du, gaur egun mundu osoan mehatxatuta baitaude.

Mehatxua hain handia denez, kasu askotan erabat desagertu da. Barakaldarren memorian Zuloko-Ibarretako padurak daude oraindik, Nerbioi-Ibaizabal estuarioko padura zabalen ezkerraldean geratzen zen azken hezegune naturala. Hortik datorkio balio eta garrantzi berezia. “Baina XXI. mendean betegarriek, zementuak eta hondeamakinek jota erori zen, aurrerapenaren eta kontsumismoaren aldarean sakrifikatuta”, gogorarazi dute talde ekologistek, eta Megaparken proiektuaren garapena aurrez aurre gaitzetsi zuten.

Hezeguneak dira klima-aldaketak gehien kaltetutako ekosistemetako bat. Itsasertzaren eta Hezeguneen Lurraldearen Arloko Planean planteatzen da kaltetutako hezegune naturalak lehengoratzea, baina ez da neurri hori bera planteatzen hiri-hezeguneetarako, Lamiakoko hezegunerako, adibidez.

Efemeride honetan, kolektibo ekologistek aprobetxatu nahi dute Bizkaian degradatutzat eta arriskuan dauden beste hezegune batzuk berreskuratzea aldarrikatzeko. Bereziki, gertu dagoen Lamiakoko padura eta Astrabuduko ibarra, Nerbioiko hezeguneen azken hondarrak, kasu honetan eskuinaldean. Padurek, dunen lokarriek eta gatz-aintzirek osatutako paisaian integratuta zegoen hezegune hori. Lehortzea (XIX. mendearen amaiera), industrializazioa eta urbanizazioa direla eta, gaur egungo paisaia sortu da.

Eremua bere aberastasunagatik, berezitasunagatik eta potentzialtasunagatik nabarmentzen da. Bizkaiko Foru Aldundiak 167 hegazti-espezieren inbentarioa egin du, eta horietatik 39 arriskuan daude. Gainera, Eusko Jaurlaritzak Euskadiko Hezeguneen Inbentarioan sartu du. “Gotorleku hori ez desagertzeko, beharrezkoa da erakundeek hezegunearen birnaturalizazioa bultzatzea”, nabarmendu dute kanpaina bultzatu duten elkarteek.

Agur esan diogu Guggenheimi, eta orain zer?

Joan den abenduaren 16an publiko egin zen Urdaibaiko biosfera-erreserbaren bihotzean Guggenheimen museo subsidiario bat eraikitzeko proiektuaren geldialdia. Zehazkiago, egoitzetako bat Muruetako paduretan proiektatuta zegoen, ontziola batek hainbat hamarkadaz kutsatuta. Bizkaiko Foru Aldundiak eta Eusko Jaurlaritzak bultzatutako proiektu ekozida ezetsi den honetan, oraindik asko dago egiteke erreserbaren biodibertsitatea defendatzeko. Talde ekologistek padurak garbitzea eskatzen dute, modu naturalean berreskuratzeko, “natura lehengoratzea ere aukera eta arrakasta baita”.

Edukiak:

• https://drive.google.com/drive/folders/17kSsDbF0ZW0a3kyPn_m4lAfsaLoIqeJk?usp=drive_link