Lurraren Egunaren esparruan, Estatu osoko ehun erakunde sozial eta ekologistak baino gehiagok “Nos levantamos con la naturaleza” / “Naturarekin altxatzen gara” manifestua plazaratu dute, ingurumenaren narriaduraren aurrean mobilizatzeko eta lehengoratze ekologikoa politika publikoen erdigunean jartzeko deia.
Natura Lehengoratzeko Aliantzak bultzatuta, ingurumen-politiketan atzera egiten ari dela ohartarazi du manifestuak; izan ere, gizarte-mobilizazioko urteetan lortutako aurrerapenak ahultzen ari dira Europako eta autonomia-erkidegoetako erakundeetatik. Erakunde sinatzaileen arabera, Europako araudiak eta babes-esparruak higatzen ari dira, «sinplifikazioa» edo «lehiakortasuna» bezalako argudioei jarraikiz. Horrek natura babesteko Estatuko eta autonomia-erkidegoetako araudiak arriskuan jartzen ditu, eta ekosistemetan eta lurraldeetan eragin handia duten jarduerak errazten ditu. Dinamika horiek interes orokorraren, osasun publikoaren eta ekosistemen babesaren aurrean gutxi batzuen epe laburreko onura ekonomikoak lehenesten dituen eredu bati erantzuten diote. “Ezin dugu ahaztu larrialdi klimatikoa eta biodibertsitatearen galera bizitzen ari garela, gure ongizatea eta etorkizuna eta planetarena arriskuan jartzen dituena”, azpimarratu dute erakundeek.
Egoera horren aurrean, erakunde sinatzaileek lehengoratze ekologikoa ekintza politiko eta sozialaren erdigunean kokatzen dute. Lehenegoratze Plan Nazionala egiteko prozesuarekin bat etorriz, helburu handinahiak eta neurri eraginkorrak sartzea eskatzen dute, degradatutako ekosistemak berreskuratzeko. Azpimarratu dutenez, lehengoratzea politika publiko integral gisa jorratu behar da, funtzio ekologikoak berreskuratzera, krisi klimatikoaren aurrean lurraldeen erresilientzia indartzera eta gizarte-ongizateari laguntzera bideratuta, eta, aldi berean, nahi ez diren gizarte-inpaktuak saihestu behar dira, hau da, inor atzean utzi gabe.
Erakunde sinatzaileek dei egiten diete herritarrei eta kolektiboei manifestuarekin bat egiteko eta Naturaren aldeko Ekintza Aste batean antolatzeko. Aste hori maiatzaren 30etik ekainaren 7ra izango da, Ingurumenaren Munduko Egunarekin bat eginez. Prozesu horren helburua lurralde osoan mobilizazioak eta ekintzak bultzatzea da, ingurumen-arazoak ikusarazteko, hurbileko inguruneak leheneratzeko ekimenak sustatzeko eta gizarte-eragileen arteko lankidetza indartzeko.
Manifestuak, halaber, gizarte-mobilizazioak bultzatu berri dituen garaipenen balioa aitortzen du, hala nola Altriren proiektua A Ulloan edo Guggenheim museoa Urdaibain geldiaraztea, erakusten baitute, lurraldeak antolatzen direnean, posible dela dinamika suntsitzaileak geldiaraztea jarduera ekonomiko tradizionalak zainduz, hala nola abeltzaintza estentsiboa, balio natural eta sozial handiko nekazaritza edo itsaski-bilketa.
Egungo egoeraren aurrean, erakundeek kezka ekintza kolektibo bihurtzeko apustua egiten dute. Antolakuntza eta mobilizazioa indartzea funtsezkoa da, ez bakarrik ingurumen-narriadura geldiarazteko, baita kaltetutakoa berreskuratzeko eta helburu komun baterantz aurrera egiteko ere: natura babesteak eta lehengoratzeak bizitza zaintzea eta pertsona guztientzako etorkizun bizigarria bermatzea esan nahi du.
Natura Lehengoratzeko Aliantzak eta erakunde sinatzaileek deialdi argia egin dute Lurraren Egun honetan: “Antolatzeko, mobilizatzeko eta naturaren alde jarduteko garaia da”.
Erakunde sinatzaileak:
EMAN HARTURAKO:
Zirkuitu ibilbidea 2, Industrialdea 15
20160 Lasarte-Oria. Gipuzkoa. Euskal Herria
bizibaratzea@bizibaratzea.eus
+34 943371545
Bidelagun
cc by-sa
Sareko kide
Ekoedizioaren Institutuko bazkide
