• Erakunde ekologistak irmo gaitzetsi du Trumpen Gobernuak Venezuelari egindako eraso terrorista. Venezuelako bonbardaketak eta Nicolas Maduro presidentearen eta Cilia Floresen bahiketa nazioarteko zuzenbidearen urraketa dira.
  
• Trumpen Gobernuak politika kolonialista, belizista eta autoritario baten alde egin du argi eta garbi, baliabideen eta energia-iturrien kontrola ziurtatzeko, mundu mailako nagusitasunaren gainbeheraren aurrean.

Ecologistas en Acción – Ekologistak Martxan taldeak salatu duenez, Venezuelaren aurkako erasoaren atzean ez dago narkotrafiko jarduerarik, baizik eta AEBrekin bat ez datorren gobernu bat kargutik kentzeko saiakera. Gobernu bat -venezuelarra-, mundu mailan petrolio-erreserba oso garrantzitsuak kontrolatzen dituena.

Venezuelaren aurkako erasoa petrolioaren arrastoari jarraituz ulertu behar da, Nigeria bonbardatu berri duten bezala. Israelgo Gobernuak Palestinako genozidioari emandako laguntzak ere logika bera jarraitzen du, Israel funtsezkoa baita erdialdeko munduko eskualde bat kontrolatzeko petrolio-erauzketan: Asiako hego-mendebaldea. Nolanahi ere, mota horretako edozein ekintzatan bezala, faktore gehiago daude, hala nola eskualdearen kontrol geoestrategikoa.

“Beste behin ere, kapitalismo globalak petrolioa behar du funtzionatzeko, eta haren kontrola tresna guztiz giltzarria da nazioarteko hegemoniari eusteko”, adierazi du erakundeak.

Ekintza inperialisten hazkunde hori, nazioarteko zuzenbidearen esparru guztietatik kanpo, AEBen mundu mailako nagusitasunaren gainbeheraren ondorio da; Txinarekin energia eta mineral baliabideen eragin eta kontrol eremuengatik duen lehiaren ondorio; eta krisi ekosozialaren larriagotzearen esparruan “ahal duenak salba dezala” politika baten aldeko apustu lotsagabearen ondorio.

Era berean, EBk eta NATOk AEBko Gobernuaren plan belizistekin duten konplizitatea salatu eta errefusatu du erakunde ekologistak, baita Espainiako Gobernuaren erantzun eskasa ere, ez baitu erasoa gaitzetsi: “Venezuelaren aurkako erasoak bertan behera uztea, legezko subiranotasunera itzultzea eta Espainiako Gobernuak aringarririk gabe gaitzestea eskatzen dugu”.

Ecologistas en Acción – Ekologistak Martxan taldeak bakearen, justizia sozialaren, armagabetzearen eta deskarbonizazioaren alde mobilizatzen jarraituko du, beharrezko eraldaketa ekosozialaren funtsezko elementu gisa, baina ez bakarrak: “Herritarrak eraso horien aurka mobilizatzeko deia egiten dugu, nazioarteko zuzenbidearen defentsan, eta elkartasuna adierazten diogu Venezuelako herriari”.