Subflubiala EZ! herri plaformak Bizkaiko herritar guztiei dei egiten die datorren larunbatean, urriaren 18an, 17:00etan, Bilboko Arriaga Antzokitik abiatuko den manifestazioan parte hartzeko. Lamiakoko ibipekoaren proiektua bertan behera uzteko eta mugikortasun-eredua aldatzeko eskatzea da helburua.

Manifestaziora joateko lehenengo arrazoia herritarrok parte hartzeko dugun eskubidea defendatzea da. Salatzen dugu Aldundiak uztailaren 17an onartu zuela behin betiko proiektua, alegazioak aurkezteko epea itxi baino aste batzuk lehenago. Aldez aurretik erabakitakoari buruzko iritzia eskatu ziguten. Hori ez da demokrazia, paripea baizik. Era berean, Uraren Euskal Agentziak emandako dokumentazioan akatsak zeuden eta zaharkituta zegoen, eta ezinezkoa zen benetako parte-hartze informatua izatea.

Subflubiala ez dator bat instituzioek hartutako konpromiso klimatiko guztiekin. Europako Itun Berdetik hasita eta Bizkaiko Foru Aldundiaren deskarbonizazio-helburuetara arte, Eusko Jaurlaritzaren 2050erako Klima Aldaketaren Estragiatik pasata. Paradoxa ikaragarria da: Aldundiak berak onartzen du azpiegiturak berotegi-efektuko gasen emisioak handituko dituela, horrela, auto pribatuan oinarritutako eta gainditu beharreko mugikortasun-eredua betikotuko duela. Larrialdi klimatiko betean, ezin dugu asfalto eta trafiko gehiagoren aldeko apusturik egiten jarraitu.

Manifestazioa osasuna defendatzeko deia ere bada. Tunelen ahoetatik hurbil dauden eremuak “sakrifizio eremu” bihurtuko lirateke, eta, kutsaduraz gain, zarata- eta bibrazio-mailek legezko mugak gaindituko lituzkete. Hainbat ikastetxek jasango lukete eragina. Era berean, salatzen dugu ez dagoela ikerketarik PM 2.5 partikulen eta eremu horietan kontzentratuko liratekeen beste kutsatzaile batzuen inpaktuari buruz, hau da, gaixotasun kardiobaskularrei, arnas gaixotasunei eta minbiziari lotutako substantziei buruz.

543 milioi euro. Kopuru hori inbertituko litzateke tunelean, eta XXI. mendeko metropoliko mugikortasun-sistema garatzeko erabili beharko litzateke. Ez gaude kontra kapritxoz. Aurka gaude, mugikortasun jasangarriko alternatibak daudelako, emisioak murriztuko lituzketenak, bizi-kalitatea hobetuko luketenak eta ingurune bizigarrira hurbilduko gintuztenak.

Deialdi argia da: urriaren 18an, larunbata, 17:00etan Arriaga Antzokian. Hau ez doa tunel bategatik bakarrik, zer hiri eredu nahi dugun baizik. Instituzioek ea entzuten gaituzten benetan eta larrialdi klimatikoa serio hartzen dugun ala existituko ez balitz bezala egiten dugun.

Mugikortasun iraunkorrarekin, parte-hartze demokratikoarekin eta lurraldearen etorkizunarekin konprometituta dauden herritar guztiei dei egiten diegu. Zure presentzia garrantzitsua da! Zure zain gaude!