Duela gutxi bi berri irakurri ditugu prentsan Plaiaundirekin (Irun) lotuta. Batak dio Irungo Udal gobernuak Plaiaundiko kirol-pistetako zati bat berrituko duela, eta besteak, berriz, IAM Irungo Areto Moldakorrerako —erabilera anitzeko pabiloirako— Plan Zuzentzailea idazteko eskatu duela.

Plaiaundiko kirol-instalazioei dagokienez, gogoratu behar dugu duela 30 urte Plaiaundiko parketik kanpo lekualdatuta egon beharko liratekeela ezarritako arau-eskakizunak betetzeko eta, ondorioz, bi hektareako eremu horretan estuarioko ekosistema lehengoratzeko, Plan eta araudi hauen arabera: Eusko Jaurlaritzak, Gipuzkoako Foru Aldundiak eta Irun eta Hondarribiko udalek 1994ean sinatutako Txingudi Babesteko eta Antolatzeko Plan Berezia eta Txingudiko naturgunea Natura 2000 Sareko babes-figuren pean kudeatzeko 2013ko araudia, figura horiek Hegaztientzako Babes Bereziko Eremua (HBBE) eta Kontserbazio Bereziko Eremua (KBE) izanik.

Antza denez, Irungo Udalak nahiago du zilegi izan daitekeen estrategia politiko bati erantzuten dion asmo handiko proiektu bat (IAM) bultzatu, nahitaez bete beharreko Europako araudia eta onartutako plan autonomikoa behingoz betetzea baino.

Bada garaia utzikeria alde batera uzteko, eta gaiari serioski heldu eta aipatutako araudia eta plan berezia behingoz bultzatzeko, kirol-instalazioak Txenpereneara lekualdatuz eta, ondorioz, 2023ko osoko bilkuraren akordioa betez.