Joan den asteko ostiralean, beste behin ere, portuko lurretan biltegiratzen diren txatar-tontor batean piztu den sute batek esnatu ditu Pasaiako badiaren inguruko biztanleak. Goizeko bostak eta erdietan, gutxi gorabehera, hasi da sutea eta, besteak beste, Lezo eta Donibane arteko errepidea itxi dute, eta udalerri horietako bizilagunek etxean geratu behar izan dute, leihoak itxita. Gomendio hori Errenteriako zati batera ere zabaldu da.

Zoritxarrez, ez da lehen aldia; txatar-tontor baten aurreko sutea 2018ko abuztuan gertatu zen, eta orduko ke-zutabea Donostiatik eta harantzago ikusi zen. Gertakari hori argitzeko, prozedura judizial bat hasi zen, eta ingurumen- eta osasun-arloan askotan gertatzen den bezala, urte askoren ondoren, oraindik ez ditugu izapide horien emaitzak ezagutzen.

Oraingoan bai, espero dugu erakunde eskudunek behar diren neurriak har ditzatela horrelako gertakariak saihesteko. Gaur txatar-tontorraren sutea izan da, baina Pasaiako portuaren inguruko biztanleei egunero eragiten diete portuko zamalanetatik askatzen diren partikula esekien isuri barreiatuek, pertsonen osasunari eta ingurumenari oro har erasotuz.

Ziur gaude neurri eraginkorrak daudela horrelako eraginak saihesteko; bestela, lan horiek hirigune handietatik, hala nola Pasaiatik hain hurbil ez dauden beste portu-instalazio batzuetara bideratzea izango litzateke alternatiba.

Talde honen iritziz, arlo honetan eskumena duten agintarien ekintza gabezia da atmosfera kutsa dezaketen jarduera horien kontrol eta zaintza faltaren eta, beraz, horrelako gertakariek sortzen dituzten ondorioen arrazoi nagusia. Era berean, uste dugu gainerako erakunde publikoek ere badutela erantzukizunik, ez baitute presiorik egiten eta behin eta berriz eskatzen agintaritza eskudunari osasun publikoa eta ingurumena bermatzeko beharrezko neurriak har ditzala.