Laster zozkatuko dira Donostiako hondartzetako toldoak. Ondarretan tarteka leku-falta dagoela ikusita, toldo eta karpa gutxiago jartzea eskatu du Eguzkik, hondartzaren erabilera publiko eta doakoa bermatzeko.

Eguraldi ona lagun, jende asko pilatzen da Ondarretan, are gehiago asteburuetan. Itsasgorak, batetik, eta harriek, bestetik, asko mugatu dezakete hondartzaren zati erabilgarria, eta, hain justu, zati hori da toldo eta karpek okupatzen dutena. Horren ondorioz, erabiltzaileen arteko ika-mikak sortzen dira, eta iaz udaltzainek zenbait eztabaida sutsu itzaltzeko ere interbenitu behar izan zuten.

Gauzak horrela, Udalari proposatzen diogu zozkatu behar duen toldo-kopurua %10 murriztea. Guztira, 718 dira; beraz, 70 bat gutxiago jartzea proposatzen dugu. Errazen ken daitezkeen toldoak egun solteetan alokatu daitezkeenak dira, noski.

Ez da begi-bistatik galdu behar klima-larrialdiaren ondorioz itsasoaren batez besteko maila gora doala; gehienontzat oharkabean, baina gora. Horra Zarauzko kasua.

Hondartzak jabari publikoaren parte dira, eta hondartzez doan gozatu ahal izatea Kosta Legeak babestutako eskubidea da. Udalak eskubide hori bermatu egin behar du. Eta eskubide hori bermatzeko toldo-kopurua pixka bat murriztu behar badu ere, erabiltzaile guztiok irabazle aterako gara.

EGUZKI, 2025eko martxoa