Iaz 15 zuhaitz landatzea eskatu genuen San Bizenteko hilerriaren eta kirol-hiriaren artean dagoen lursailean, baina ukatu egin ziguten, zuhaiztiaren plangintza faltagatik eta euren ezaugarriengatik. Orain, urtebete geroago, Sasiburu elkartearekin eta Bagatzako kontsumo taldearekin elkarlanean, lursail berean landaketa bat egitea eskatu dugu berriro, baina Udal Zerbitzuetako buru teknikoak, Udal Zerbitzuen Arloko zinegotzi ordezkariarekin batera, ezezkoa eman digute berriro, lur eta plangintza falta dela argudiatuta.

Gure ustez, hamabi hilabete nahikoak dira ustezko hobekuntzak egiteko landaketa hori egin ahal izateko; kasu honetan, mota guztietako begetaziorik ez duen eta soropilez soilik estalita dagoen alfer-lur batean. Bertatik ehunka pertsona igarotzen dira, uda partean 35ºC-ko tenperaturak jasan daitezke, eta neguan haizearen eta euriaren zaparradak ere. Ez litzateke zentzuzkoa izango zelai zabal horiek egokitzea arteak, gorostiak eta zuhaixka desberdinak landatzeko, ingurua biziarazteko?

Badirudi gure agintariek propaganda egiteko baino ez dutela hitz egiten hiri-zuhaiztiei buruz. Gogora dezagun hauei esker lortzen dela bero-boladek eragindako tenperatura altuen arintzea eta poluzioa  murriztea; gure erakundeek beren diskurtsoetan ematen duten aurpegi berdeko zuriketa tipikoa sustatzen dute. Baina errealitatera eramateko garaian, egia da ez dutela beraiek bakarrik ezer landatzen, baizik eta erakunde ekologistek edo auzotarrek landaketak egitea proposatzen dutenean familiei eta haurrei dei eginez, beste herri askotan egiten den bezala, pegak jartzen dizkigutela. Badirudi Barakaldoko agintarientzat berdeguneak belarra moztuta duten zelaiak baino ez direla izan behar, eta ez dutela ez lorerik ez sastrakarik hazten uzten, ehunka txakurren gorotzekin apainduta daude, eta, jakina, zuhaitzik gabe hobe.

Lorezaintzako zerbitzuetatik landatzen ez dutena landatzen uzteari uko egiten dioten horiek nahiko erreta gauzkate. Zergatik hainbeste larderia baimenak ukatzean? Jakin beharko lukete, Osasunaren Mundu Erakundearen gomendioen arabera, “hiri batek itxura osasungarria izan dezan, gutxienez zuhaitz bat egon behar dela hiru biztanleko”, eta Barakaldok, jakina, ez duela betetzen.

Salaketa-ohar honekin, landaketari ezezkoa eman dioten pertsonei dei egiten diegu: David Arribas Guijarrubia EAJko zinegotziari, Javier Montesinos Udal Zerbitzuen Zerbitzu Teknikoko buruari eta Epifanio Rosón Lorezaintza gainbegiratzeko teknikari arduradunari, 2030 Agendaren helburuak bete ditzaten, OMEren gomendioei muzin egin ez diezaieten, eta lan egiten duten udalaren gomendioetako bati gutxienez men egin diezaioten. Herritarren parte-hartzea bultzatzea ezaguna egiten zaizue?

Espero dugu aurtengoa izatea Zuhaitz Egunik egingo ez dugun azken urtea, Barakaldok ez baitu merezi ehunka zelai izatea zuhaitz ziztrin, lore eta zuhaixkarik gabe.

Oso bestela, eskerrak eman nahi dizkiogu Alba Delgadori, Garapen Jasangarriaren eta Ingurune Naturalaren Arloko zinegotzi ordezkariari, landaketa aurrera atera zedin bitartekari lana egiten saiatzeagatik, eskerrik asko!

Barakaldoko Eguzki talde ekologista

2025eko martxoaren 7an