Gaur sartu da indarrean itsasertza kudeatzeko transferentzia, eta horrek eskumenaren gainean egon zitekeen edozein duda argitzen du

Agiti leheneratzeko eskaera Kosta Zerbitzuari egin genion iaz. Honek erantzun digu arrain-haztegiaren zati bat baino ez dagoela itsas-lehorreko jabari publikoan; gainerakoa jabariaren babes-zortasuneko eremuan dagoela. Eremu horretan Jaurlaritzak omen du eskumena, ez Kosta Zerbitzuak. “Horregatik –diosku Zerbitzuak helarazi digun erantzunean–, Estatuko Administrazioak ezin du [Agitiko arraindegia ezabatzeko] bere kabuz jardun, nahiz eta modu batean edo bestean babes-eremuan dauden instalazio horiek itsas-lehorreko jabari publikoan daudenei lotuta egon”.

Eskumen-kontua, nonbait. Baina gaur, apirilak 1, indarrean sartu da Estatuak Autonomia Erkidegoari itsasertza antolatzeko eta kudeatzeko egin dion transferentzia. Beraz, eskumenei buruz egon zitekeen edozein duda argituta geratu da: Agiti leheneratzean, Jaurlaritzari dagokio lidergoa. Beste administrazioekin elkarlanean, beharbada, baina zalantzarik gabe berari dagokio bultzada.

Eguzkik, halaber, Culmanor SAri legez dagozkion ardurak erreklamatzeko eskatu du. Izan ere, Kostaldeei buruzko Erregelamendu Orokorrak, 147. artikuluan, honako hau dio: “Emakida bat iraungitzen den kasu guztietan, Estatuko Administrazio Orokorrak erabakiko du obrak eta instalazioak mantentzea edo jabari publikotik eta haren babes-zortasuneko eremutik jaso eta kentzea emakida jaso duenak berak, bere kontura”.

Laburbilduz: haztegiak urteak daramatza abandonatuta eta zeharo hondatuta, “oso balore ekologiko eta paisajistiko nabarmena duen eta leheneratzeko gaitasun handia duen” paraje berezi batean”. Eta ez dugu inolako arrazoirik ezagutzen paraje hori naturarako eta erabilera publikorako lehenbailehn ez berreskuratzeko.

EGUZKI, 2025eko apirilaren 1ean