Auzipetu batekin Elkarrizketa

2021eko ekainaren 15ean operazio bat izan zen Limousin eskualdean, eta hamabi pertsona atxilotu zituzten hainbat sabotajerekin ustez lotuta egoteagatik. Horietatik sei hainbat egunez atxilotuta egon ziren, eta hiruri terrorismoaren aurkako legedia aplikatu zitzaien; horrek esan nahi du hiru edo lau egunez inkomunikatuta egon zirela. Elkarrizketa honetan auzipetutako pertsonetako batekin hitz egin dugu.

Zein ekintzek eragin dute epaiketa hau?

2020ko otsailean sabotaje bat izan zen Linky kontagailu adimendunen aurka. Argindar-kontagailu berri hauek automatikoki bidaltzen dute zure etxeko informazioa uhinen bidez: zure kontsumoa ezagutzen dute, etxean zauden ala ez dakite, eta baita normalean zein telebista-kate ikusten duzun ere! Dena kontrolatzen dute, eta gainera uhin elektromagnetikoen sistema bat da, etxearen barrenera uhinak bidaltzen dituena. Jende askok ez zuen onartu nahi izan haien instalazioa, baina derrigorrez ezarri zituzten. Orduan hasi zen horren aurkako kanpaina: ENEDIS linea elektrikoen enpresaren zentral batean sabotajea izan zen, eta materiala zuten zortzi furgoneta erre zituzten. Gero, 2021eko urtarrilean, beste sabotaje bat izan zen telekomunikazio-zentro batean; telebista-antenak suntsitu zituzten. 230 metroko antena bat erre zen, 5G erabiltzen duten konpainien errepikagailuekin. Dirudienez, antena militar bat ere bazegoen.

Nolakoa izan zen atxiloketaren prozesua?

Goizeko seiak edo sei terdiak aldera gendarmeriako esku-hartze taldeak iritsi ziren nire etxera; terrorismoaren zantzuak daudela uste dutenean jarduten duten taldeak dira. Guk ez dugu etxeko atea giltzaz ixten, eta lasai asko sar zitezkeen, baina sarraila hautsi zuten; halako esku-hartzeetan ohikoa dena. Nire gelara igo ziren metrailadore moduko armekin eta laserrarekin. Ni ohean nengoen, biluzik, eta horrela miatu ninduten. Lasai mantendu nintzen; izan ere, ikusi nuen haietako bat pixka bat dardarka zegoela, eta esan nion: «lasai, lasai». Eta kitto, atxilotu gintuzten.

(Segi irakurtzen)