La Guairan erreskate taldeak lanean desagertuak aurkitzeko.

Erlojupean ari dira lanean Venezuelan. Bost egun igaro dira lurrikarak jazo zirenetik eta txikituz doa desagertuak bizirik aurkitzeko esperantza. Gutxienez 1.450 pertsona hil dira, eta 3.150 zauritu zenbatu dituzte. "Gaurkoan jakinarazi behar dut dagoeneko 1.450 pertsona hil direla gure herrialdeak bere historian jasan duen hondamendi naturalik bortitzenaren ondorioz", jakinarazi du Jorge Rodriguez Venezuelako Parlamentuko presidenteak igande arratsaldean. NBE Nazio Batuen Erakundeak aurreikusi du 50.000 desagertu inguru izan daitezkeela.

Pasa den asteazkeneko bi lurrikarek, 7,2 eta 7,5 gradukoak, hondamendia eragin dute Venezuela, batez ere La Guaira estatua, lurrikaren epizentroa. Lurrikarek etxebizitzak, eraikinak eta saltokiak eraitsi dituzte; 774 eraikin kolapsatuta daude eta 12.721 familia kaltetuta daude. Etenik gabe jarraitzen dute lanean desagertuak aurkitu eta hondakinak garbitzeko. Delcy Rodriguez presidenteak adierazi du konpondu dela argindar azpiegituren %75 eta ur hornidura katearen %68. 

Euskaldunak biktimen artean

Momentuz baieztatu diren hildakoen artean bi euskal jatorriko daude. Bat Alazne Solabarrieta da, 65 urtekoa, Bigarren Errepublikan Venezuelara ihes egin zuen Jose Maria Solabarrieta Ondarroako alkatearen biloba. Bigarrena Jon Sustacha da, 69 urteko ingeniari bilbotarra. Sustacharen gorpua La Guairako bere etxean topatu dute. Ordea, desagertuen artean jarraitzen du Koro Badiola gipuzkoarrak.

Etxera itzultzea lehentasun

Venezuelako presidenteak jakinarazi du batzorde berezi bat sortuko dutela kaltetutako eraikinak ikuskatu eta baloratzeko berriro okupatuak izan daitezkeen ala ez, eta behin-behineko kanpalekuak eraikiko dituzte, helburua baita herritarrak ahalik eta azkarren itzultzea etxera. Halaber, gehitu du "berehala" hasiko direla etxebizitza berriak eraikitzeko lanetan. Bitartean, ikastetxeak itxita daude eta klaseak bertan behera geratu dira.

Gobernuak militarizatu egin du kaltetutako eremua eta ez bertaratzeko eskatu die herritarrei, arriskuak ekiditeko. Asteazkeneko lurrikara gogorretatik, 430 erreplika baino gehiago erregistratu dituzte. "Oso egoera txarrean daude eraikinak, pauso txar bat eta guztia erortzen da", azaldu du erreskate lanetako langile batek ETBren bart gaueko albistegian. 

Ordea, orduek aurrera egin ahala, etsipena areagotzen ari da kaltetutako eremuetako herritarren artean eta asko suminduta daude. "Ez Polizia ez Guardia Nazionala. Jatera eta argazkia ateratzera etorri ziren, gerora esateko lanean zeudela", kexatu da gazte bat ETBko albistegian. "Abandonatuta" utzi dituztela salatu eta makineria pisutsua eskatu dute. 

Kaosa nagusitu da Venezuelan. Ospitaleak eta gorputegiak gainezka daude, eta asko kalean ari dira lo egiten, bizilagunengandik jasotako arropa, janari eta botikekin. 

Nazioarteko laguntza

Nazioartetik ere bidali dute laguntza Venezuelara, hala nola, Argentinatik, Txiletik, El Salvadorretik, AEBetatik edo Txinatik. Azken horrek 12,9 milioi eurotan baloratutako laguntza humanitarioa bidali du. NBEk behin-behineko erietxe bat eraikitzeko materiala bidali du. 

ElDiario.es komunikabidearen analisia idatzi du Andrew Roth-ek. Dioenez, Venezuelako ezbeharrak frogatuko du AEBen aro berria Amerikako mendebaldeko hemisferioan. Trumpen administrazioa erantzun "eraginkor" bat ematen saiatzen ari da orain lagun kontsideratzen duen herrialdeari, urtarrilean armada estatubatuarra Venezuelan sartu eta Nicolas Maduro presidentea atxilotu eta gero, Rothen hitzetan. AEBek hiru erreskate talde bidali dituzte eta zin egin dute 150 milioi dolarreko sorospen-funtsa bidaliko dutela.