Kantauri itsasoa, Zarautzetik.

Ekainean argitaratutako txostenaren arabera, klima aldaketaren ondorio esanguratsuetako bat da ozeanoetako uren tenperaturaren igoera, eta hori aztertzea "funtsezkoa" da eremu edo eskualde bakoitzean klima izaten ari den aldaketak ebaluatzeko. Bada, txostenak ondorioztatu du Ipar Atlantikoan "aldaketa handiak" izan direla azken hamarkadetan, Bizkaiko Golkoan barne. Agertoki horren aurrean, klima aldaketak ozeanoetan dituen eraginei aurrea hartzea eta haiek ulertzea azpimarratu dute: "Ezinbestekoa da prozesu ozeanikoak beren konplexutasunean ezaugarritzea, epe laburrera eta epe luzera nola eboluzionatzen duten aztertuz eta klima aldaketak behatutako aldaketetan duen eragina identifikatuz".

Fundazioak eginiko txostenaren arabera, 2023an eta 2024an itsasoa "aurrekaririk gabeko" neurriak eta datuak erakusten ari da. Esaterako, Donostiako Aquariumeko itsasoko gainazaleko tenperaturaren nabarmen igo da azken hamarkadetan: 1946tik 1980ra bitartean hamarkada bakoitzeko 0,06 graduko igoera izan zuen bitartean, 1980tik 2023ra 0,28 gradu igo da, munduko uren tenperaturaren batez besteko igoeraren bikoitza baino gehiago. 

Ozeanoko uren tenperatura igoerarekin batera, itsasoan bero bolada "luzeagoak, ohikoagoak eta intentsitate handiagokoak" gertatzen ari direla dio txostenak: "Bolada horiek ondorio dramatikoak izan ditzakete itsasoko ekosistemetan". Bizkaiko Golkoan, esaterako, Naturklimak eginiko ikerketak 2023an hamar bero bolada zenbatu ditu –2022an sei gertatu ziren–: urte horretako bero boladarik luzeena maiatzean abiatu zen, eta 32 egun iraun zituen. Hain zuzen, aldi horretan zenbatu ziren eremu horretako uren tenperaturarik altuenak.

Golkoko itsas mailaren igoera, munduko batez bestekoaren antzekoa

Itsas mailaren batez besteko aldaketa klimaren bilakaeraren "funtsezko" adierazleetako bat da, txostenaren esanetan. Bada, ozeanoko uren tenperaturaren igoerarekin ez bezala, Bizkaiko Golkoko itsas mailaren batez besteko aldaketa datu globalen antzekoa izaten ari da azken hamarkadetan: 1990ko hamarkadaz geroztik, itsaso horren maila 1,3 eta 3,9 zentimetro artean igotzen ari da hamarkada bakoitzean –batez beste 2,6 zentrimetro–; itsasoko mailaren batez besteko aldaketa globala, berriz, 3,7 zentimetrokoa izan da 2006tik 2018ra.