Eusko Jaurlaritzako, Iberdrolako eta Siemens Gamesako ordezkariak Oiz (Bizkaia) mendian, astelehenean eginiko agerraldian.

Aurrera doa Oion (Araba) herrian eraiki nahi duten Labrazako parke eolikoaren proiektua, bi hamarkadaren ostean Araban eta EAEn eraikiko duten lehena. Agerraldia egin dute astelehenean Oiz mendiaren gailurrean –EAEn eraiki zuten azkena– Mikel Jauregi Eusko Jaurlaritzako Trantsizio Energetiko eta Jasangarritasuneko sailburuak, Julio Castro Iberdrola Renovableseko zuzendari exekutiboak eta Kerman Gabiola Siemens Energy eta Siemens Gamesako zuzendariak, eta adierazi dute Labrazako parke eolikoa 2025eko azken hiruhilekoan eraikitzen hastea espero dutela. Iberdrolak eta EEE Energiaren Euskal Erakundeak sortutako Aixeindar enpresa da proiektuaren bultzatzailea –Iberdrolak akzioen %60 ditu eta EEEk %40–, eta 59 milioi euroko inbertsioa izango du hastapenetan. Agerraldian jakinarazi dutenez, 2026ko amaieran martxan jartzea aurreikusten dute bultzatzaileek.

Parke eolikoa Siemens Gamesak eraikitako zortzi aerosorgailuk osatuko dute, eta bakoitzak bost megawatt ekoitziko ditu. Beraz, 40 megawatteko potentzia izango du parkeak, eta ia 100 megawatt ekoitziko ditu urtean –30.000 etxe hornitzeko adina–. Lakuak jakinarazi duenez, "hegaztiak eta biodibertsitatea babesteko" hainbat neurri hartuko ditu parke eolikoak: hegaztiak detektatzeko eta, hala eginez gero, aerosorgailuak gelditzeko gailu bat izango du eta "paisaian integratuko" da "harriaren zahartze naturalaren tratamenduaren bidez". Gainera, parkeak ez du beharko azpiegitura elektriko berririk sarera konektatzeko, eta, horrela, ingurumenean dituen eraginak "asko murriztuko" ditu.

Hego Euskal Herrian energia berriztagarrien makroproiektuen zaparradari zenbakiak jarri genizkion iazko azaroan, Araba, sakrifikatu nahi duten alaba? erreportajean.

Udalaren eta herritarren desadostasuna

Aurrera badoa ere, Oiongo Udala eta herritarrak Labrazako parke eolikoaren aurka daude. Udalak –EH Bildu dago agintean– "behartuta" onartu zuen parke eolikoaren proiektua otsailean, udal batzarrean baztertzeak zein ondorio juridiko izango lituzkeen jakiteko txosten bat egiteko eskatu ondoren. Izan ere, eraikitzen hasteko behar diren baldintza guztiak betetzen ditu proiektuak: ingurumen inpaktuari buruzko adierazpena, aurretiazko administrazio baimena eta eraikitzeko administrazio baimena. Arabako Errioxa Bizirik talde ekologistak Oiongo udalaren erabakia "kontraesana" zela adierazi zuen, eta Labrazako 75 bizilagunei "bizkarra" ematea leporatu zien.

Arabako Errioxa Bizirik-ek soilik ez, Arabako Mendiak Aske taldeak ere gaitzetsi zuen udalaren erabakia ohar baten bidez. "Oionen ustezko prebarikazio baten aitzakian egin zen osoko bilkuran baiezko batekin justifikatu ziren bozketek agerian uzten dituzte maniobra legal eta alderdikoiak, eguneroko politika egiteko beharrezko moduan onartzen direnak", adierazi zuten oharrean. Talde ekologistarentzako, bazeuden arrazoiak proiektua geldiarazteko: horietatik garrantzitsuena, "Labrazako herriak 'ez' esan zuela".