Beroaldi betean dago Kantauri itsasoko ertz osoa, eta bero boladen kalteak larriagotu egin du klima aldaketak eragindako ozono kutsaduraren igoera. Euskal Herrian astelehen honetan gainditu dira legez ezarritako ozono mugak; Andoainen (Gipuzkoa), zehazki: ordubetean neurtutako 180 mikrogramo ozonoko langa pasa da metro kubiko aire bakoitzeko. Ekologistak Martxanek salatu du Eusko Jaurlaritzak legedia “urratzen” duela, informazioa emateko atalasea pasata, ez baitie herritarrei arriskuen berri eman.

Ez da batere ohikoa kutsadura hori, Kantauri isurialdean ozonoa sortzeko joera txikia duten klima baldintzak baitaude; hala nola, eguzki erradiazio baxua eta eurite handiak. Hortaz, erakundeak klima aldaketaren ondorioz gero eta ohikoagoak diren beroaldiei egotzi die ozono kutsadura areagotu izana. 

Gainera, hiri eremuetako motordun trafiko handiak eta industria eta portu jarduerak, tartean, Bilbokoa eta Pasaiakoa (Gipuzkoa), ozono maila areagotzen duela erran du. Europako Ingurumen Agentziaren arabera, azken egunetako ozono mailekiko esposizioak 63.000 heriotza goiztiar inguru eragiten ditu Europako Batasunean.

Jakinarazpenik ez

Legeak ezartzen duenez, zortzi orduz airearen metro kubiko bakoitzeko 120 mikrogramo ozono antzemanez gero, erakundeek ozono isuriaren arriskuez ohartarazi behar diete herritarrek. Talde ekologistaren arabera, Eusko Jaurlaritzak ez du jakinarazpenik egin. 

Herritarrei ohartarazi behar zaie “egunaren erdiko orduetan eta arratsaldeetan babestu” behar direla, eta “ahalegin fisiko oro eta aire zabaleko ariketak saihestu” behar dituztela. Bereziki, “kutsadura atmosferikoarekiko sentikorrenak diren biztanleei” zuzendu behar zaie gobernua; hala nola, haurrak, adinekoak, haurdun dauden emakumeak edo bihotz- eta arnas-gaixotasun kronikoak dituzten pertsonak. Horrez gain, kutsaduraren bilakaeraren aurreikuspenari, eraginpeko eremuei eta gertakariaren iraupenari buruzko informazioa ere eman behar du Eusko Jaurlaritzak. 

“Ez da lehen aldia”

Ekologistak Martxan-ek adierazi du “ez dela lehen aldia erakundeek herritarrei informazioa ematen ez dietena”, eta erantsi du administrazioek ez dituztela beharrezko prebentzio neurriak hartu: “Ez dute mugatu ibilgailu motordunen trafikoa, ezta hiriguneetako industria jarduera ere”. Hain justu, horiek dira bero boladaren “erantzule nagusiak”.

Ekologistak Martxan taldearen iritziz, enegarrenez gelditu da agerian “agintariek atmosferaren kutsadurari aurre egiteko duten interes eskasa”. Ekologistek “pasibotasuna” eta “arduragabekeria” leporatu dizkiete gobernuei, eta exijitu diete “epe laburreko ekintza planak egitea eta aplikatzea”, trafikoaren eta industriaren arloan bereziki.