Asteartean Errioxako San Pelayo mendian piztutako sutea.

Pirinio Atlantikoetako departamenduko prefeturak zaintza eta alerta egoeran ezarri du Pirinio Atlantikoetako departamendua. Ondorioz, lehorteak saihesteko ostiraletik aurrera ur murrizketak ezarriko dituzte Euskal Hirigune Elkargoak barne hartzen dituen eta alerta egoeran dauden 158 herritan; zaintza egoeran dauden udalerrietan, oraingoz, ez dute neurri bera hartuko. Erabakiaren ondorioz, besteak beste, igerilekuak ezingo dira gehiago bete eta etxeetako baratzeak edota kirol zelaiak soilik 20:00ak eta 08:00ak artean ureztatuko ahalko dituzte.

Euskal Herri osoan izaten ari den bero sapak tenperatura altuena ezarri zuen astearte arratsaldean: 44 gradura iritsi ziren termometroak Laudion (Araba), eta barnealdeko leku ugaritan gehienezko tenperaturak 40 graduraino heldu ziren. Asteazkenean, ordea, azken bi egunetan goia jo duen bero boladak eten bat izango du Hego Euskal Herrian: Euskalmeten arabera, barnealdean 31 eta 34 artean ibiliko dira termometroak, eta kostaldean gehienez ere 30 gradu egingo ditu. Halere, metereologia agentziek abisu horia ezarria dute barnealdean –asteartean abisu laranja ezarria zuten Euskal Herria osoan–.

Gainera, Euskalmetek aurreikusi du laino gehiago agertuko direla barnealdean zein kostaldean, eta litekeena dela zaparradak izatea zenbait lekutan. Hegoaldeko joerari jarraiki, tenperaturak behera egingo dute Ipar Euskal Herrian, Meteo Franceren arabera: barnealdean tenperaturak 34 gradu inguruan ibiliko dira, eta kostaldean ez dute gaindituko 30 graduko langa. Tenperaturen arintzea, ordea, trumoien arriskuarekin batera etorriko dela ohartarazi du Meteo Francek, eta alerta horia ezarri dute eremu osoan.

Suteak protagonista

Iberiar penintsula osoan erregistratutako tenperatura altuek suteak areagotzea eragin du: esaterako,  Araba hegoaldera iritsi zen arratsaldean, Bastida ingurura, baina gauerako kontrolatzea lortu zuten suhiltzaileek. Zarrakaztelun (Nafarroa), berriz, larunbatean pinudi batean piztutako sua itzali ezinda dabiltza azken egunetan; 220 hektarea erre ditu oraingoz, eta sua kontrolpean badute ere, oraindik ez dute itzaltzea lortu.