Ekienea proiektuaren aurkezpena, 2020an. Bertan daude proiektuaren jabe diren erakundeetako ordezkariak.

Espainiako Gobernuak argi berdea eman dio Ekieneak Armiñonen egin asmo duen proiektuari: ehun hektareatan 231.000 eguzki panel jarriko dituzte. Guztira, proiektuak berrehun hektareatik gora izango ditu: erdia bideratu dute eguzki paneletara, eta beste erdia "ingurumena konpentsatzeko eta baso eremuak zaintzeko" lursailetara. Hego Euskal Herriko bigarren eguzki parke handiena izango da, Corellakoaren atzetik.

Proiektua 2020. urtean aurkeztu zuten, eta orduko hartan aurreikusi zuten 2022 amaierarako obrak hastea. Aurreikusitakoa baino hiru urte beranduago heldu da ebazpena, ordea.Ekienea proiektua entitate pribatu eta publikoen artekoa da: hiru laurden Iberdrolaren jabetzakoak dira, %18 Energiaren Euskal Erakundearenak, %5 KREAN Moldragok Taldeko taldearena  eta %2 Arabako Foru Aldundiarena. Ez dute aurreratu lanak noiz hasiko diren, baina bai bere kostuak eta ekarriko dituen lanpostuak: eguzki parkea sortzeak 70 milioi euroko kostua izango duela aurreikusi dute. 300 lanpostu sortuko dituela eta 47.500 etxe hornitzeko beste energia sortuko duela diote. 

Armiñongo Lacorzana inguruan eraikiko dute parkea. Espainiako Gobernuak idatzitako txostenak jasotzen du parkea eraiki asmo duten eremuak interes geologikoa duela, eta biodibertsitatearen aldetik ere hegazti espezie ugari behatu dituzte. Hori horrela, txostenak zenbait aholku bildu ditu ahalik eta "inpaktu txikiena" eragiteko, eta proiektuak aurreikusi ditu zenbait neurri biodibertsitatearekin “bizikidetza” berreskuratzeko asmoz; tartean, zenbait zuhaitzekin eremua basoberritzea.