Vibrantz fabrika, Laudion.

Eusko Jaurlaritzaren Segurtasun Sailak jakinarazi duenez, leherketa bat izan da Laudioko (Araba) Vibrantz enpresako labeetako batean, 00:30ean; eta, horren ondorioz, langile bat hil da. Laudiokoa zen behargina eta 49 urte zituen.

Suhiltzaileak eta Osalaneko teknikariak bertaratu dira, istripua zergatik gertatu den ikertzeko, eta ezbeharra gertatu den eremuan segurtasun neurri guztiak betetzen ote ziren egiaztatzeko.

Vibrantz lantegian pinturak egiteko pigmentu ez-organikoak fabrikatzen eta merkaturatzen dituzte, eta ekoizpena bi egunez gelditzea erabaki dute, Aiaraldea komunikabideak jakinarazi duenez. Langile Batzordea, bere aldetik, mobilizazioa deitzeko bilera egiten ari da. 

LAB sindikatuak egindako zenbaketaren arabera, aurten 32 langile hil dira Euskal Herrian lan istripuz; zendutako 33. langilea litzateke Laudiokoa. ELAk, berriz, lan istripuen ondoriozko 20 heriotza zenbatu ditu orain arte; 21 lirateke gaurkoa kontuan hartuz gero.

Aiaraldean, azken hamarkadan, 18 beharginek baino gehiagok galdu dute bizia lanpostuan zirela. Azkena duela urtebete izan zen, Amurrioko Tubos Reunidos lantegian, altuera batetik erorita.