Diputazioan kateatu da pertsona bat subflubialaren aurka

Ostegun arratsaldean pertsona bat kateatu da Bizkaiko Diputazioaren eraikinean Subflubiala proiektuak eragingo lituzkeen kalte ekologiko eta sozialak salatzeko asmoarekin, baita larunbatean Arriagatik egingo den manifestaziora deitzeko ere. Polizia heldu denean, katea hautsi eta kide guztiak identifikatu dituzte.

ARGIAri igorritako oharrean jakinarazi dutenez, kaltegarria izango litzakeen proiektua da eta azpimarra jartzen dute sustatzen duen garraio ereduan. Hain zuzen ere, diputazioak eginiko ingurumen inpaktu txostenean oinarrituta, autoen aldeko dei efektua egingo luke eta horrek ingurumenean ondorio kaltegarriak eragingo lituzke. Gainera, proiektu honek izango lukeen gastu publikoa "handiegia" litzatekeela uste du plataformak, 500 milioi euro baino gehiago xahutzea aurreikusten baita.

Honez gain, larritzat jo dituzte gizartean edukiko lituzkeen albo kalteak ere. Besteak beste, inguruan kokaturik dauden ikastetxeetan ikasle zein langileei osasun kalte larriak eragingo lizkiekela aurreikusten dute. Aipatu beharra dago, pasa den ekainean lau ikastetxek (Artaza-Romo institutua, Betiko Ikastola eta Romo eta Artaza eskolak) era bateratuan komunikatu bat atera zutela Subflubiala proiektua bertan behera gelditzeko eskatuz.

Artaza parkea eta Galindoko erreka ere kaltetuko lituzkeela gogoratu dute. Artazako parke honetan dozenaka zuhaitz ebakiko lituzkete eta parkearen zati bat itxita geldituko litzateke obrak iraun bitartean, eta bertan egiteko aurreikusita daukaten zubibideak errekaren ekosisteman eragin negatiboak edukiko lituzkeela jakinarazi dute, babestuta dagoen hiruarantza arraina arriskuan jarriz. Gertaera hauek salatzeko larunbatean 17:00etan Arriagatik abiatuko den manifestaziora batzera deitu du Subflubiala Ez! plataformak.