Gorka Laurnaga eta Lorea Flores, manifestuaren egile eta sinatzaileetako bi, testua eskuan.

Klima larrialdiari aurrean erregai fosilekin amaitu behar dela eta trantsizio energetiko "justu eta azkar bat" egin behar dela defendatzen duen taldea sortu berri da: Stop Fosilak. Manifestua kaleratu du talde horrek, eta sinatzaileen artean daude Euskal Herriko ingurumen arloko ekintzaileak, unibertsitateko irakasleak, ikertzaileak eta kazetariak, hala nola: Gorka Laurnaga klima-ekintzailea, Lorea Flores Greenpeaceko koordinatzailea, Arturo Elosegi ekologia irakaslea, Jon Urzelai kultur kritikaria, Ugo Mayor ikerlaria, Joseba Azkarraga EHUko irakaslea, Aitziber Lasa Elhuyarreko Zientzia-hezkuntzako proiektuen arduraduna, eta beste asko, 

Bizitzaren alde, Stop Fosilak izeneko manifestuan, sinatzaileek Euskal Herrian eta munduan klima aldaketaren ondorioz bizi ditugun egoera larriak azpimarratu dituzte, bai klimatikoak bai sozialak, eta erregai fosilak direla "erantzule nagusiak". Nabarmendu dute IPCC-ren esanetan 1,5 Cº-ren azpitik mantendu beharko litzatekeela lurraren beroketa eta CO2 isuriak erdira murriztu 2030 urterako: "Horretarako, kontsumoen murrizketaz gain, energia berriztagarrien ahalmen globala hirukoiztu eta energia-eraginkortasuna hobetzeko bataz besteko tasa bikoiztu egin behar dira gaurtik 2030. urtera bitarte".

Egun, AEBetako "Etxe Zuriak eta hidrokarburoen lobbyak abiatu eta Europan eskuin muturrak bere egin duen oldarraldi fosilista betean" gaudela ziurtatu dute. "Petro Herri batean bilakatu gara –dio manifestuak–.  Lemoizi ezetz esan genionetik, 50 urtez erregai fosilek hornitu dute eta hornitzen jarraitzen dute gure egunerokoa".

Horren aurrean, beren ustez "dilema ez da desazkundea ala energia berriztagarriak, biak behar ditugu, eta aldi berean gainera". Zentzu horretan, sinatzaileek ez dute uste "teilatuak plaka fotovoltaikoz betetzea" nahikoa izango denik, argindar beharrak handitzen joango direlako, euren esanetan: "Energia kontsumoa asko murriztuta ere, hiriguneak, industria edo oinarrizko ekipamendu eta zerbitzuak (ospitaleak, eskolak, trenak, tranbiak, autobusak…) berriztagarriekin hornitu nahi baditugu, zentral eoliko eta fotovoltaikoak ezinbestean gure paisaiaren parte bilakatu behar dira", irakur daiteke testuan.

Kontsumo murrizketaren, autokontsumoaren eta zentral eoliko zein fotovoltaikoen artean "mailakatzerik" ezin dela ezarri diote: "Dena batera egin beharra dago, bakoitzari bere helburu propioak ezarriz". Ondorioz, manifestuaren arabera, "Euskal Herriak 'zenbat?, 'non?' eta 'nola?' galderei erantzun behar die urgentziaz".