Egitarau oparoa gozatu ahal izan dute Lurramara hubildu direnek.

21. edizioa izan da aurtengoa, eta berriz ere jendetza hurbildu da Miarritzeko Irati erakustazokara. Antolatzaileek prentsa ohar bidez jakinarazi dutenez, 25.000 pertsona izan dira hiru egunez, eta Lurramako egitarau oparoa gozatu dute: hitzaldiak, merkatua, kontzertuak, ostatua eta janaria... Pertsona guzi horiek hartzeko 1.000 laguntzaile aritu direla lanean ere nabarmendu dute. EHLGko antolatzaileek nabarmendu dutenez, laborantza herrikoiaren garrantzia baieztatu duen edizioa izan da aurtengoa ere. 

Ura ardatz hartuta, beroketa klimatikoaren desafio berriak izan ditu hizpide aurtengo edizioak. Laborantza herrikoia bultzatuz, lehorteei nola aurre egin aipatu dute hainbat ekitaldiren bidez, eta Gilles Bœuf gomita (biologoa, bioaniztasunean aditua) izan da, besteak beste, galdera horri erantzuten. "Bizidunak jakin du 4.000 milioi urtez aldatzen, eta gu ezaxolakerian gabiltza eta ez gara gai aldatzeko", adierazi zion ARGIAri Jenofa Berhokoirigoinek eginiko elkarrizketa honetan. Ura bizitzeko ezinbesteko baliabidea izateaz gain, laborantzarako eta lurraldeen orekarako berebizikoa dela oroitarazi dute antolatzaileek. Uraren desafioa begi-bistakoa denean, "laborariek, herritarrek, elkarteek eta hautetsiek elkarrekin lan egin behar" dutela adierazi du Lurramak.

Aurtengo eskualde gomitatua Frantziako Ardexa izan da, eta merkatuan edo hitzaldi ezberdinetan parte hartzeko aukera izan dute bertako laborariek. Horrela, "beren lurraldearen aberastasuna, laborantza mozkinak, jakintzak eta berezitasunak erakutsi ahal izan dizkiote publikoari". Euskal Herriko laborariekin mintzatuz, "laborariek heien esperientziak eta praktikak trukatu ahal izan dituzte saloi denboran". Honela borobildu du bere oharra Lurramak: "Ura zaintzea, lurra lantzea eta zaintzea: laborantza iraunkorra defendatzen eta biziarazten kausituko dugu elkarrekin".