Sialis espezieak Neuroptera Ordenean sartuta zeuden garai batean, baina gero Megalopteran txertatu ziren, bere ezaugarriak hobeto baitetozten talde horretako ordezkarien artean. Intsektu iluna da, marroi eta beltzaren arteko kolorazio nagusikoa. Batzuetan, ordea, bere buruan mantxa laranjatuak izan ditzake. Lau hego ditu, antzekoak baina desberdinak, aurrekoen oinarria zabalagoa baita atzekoena baino. Hegoen zaineriak gelaxkak mugatzen ditu, eta sinple samarra da beste intsektu batzuen zaineriarekin alderatuz gero. Helduek, pausatuta daudenean, teilatu modura biltzen dituzte bizkarraldean. Antenak ere handi samarrak dira, eta buruan ez dute ozelorik (begi sinpleak). Munduan leku gutxi daude talde honetako espezierik gabe, nahiz eta lurralde heze eta epeletan ugariagoak izan.

Esan bezala, bere bizitzan lau fase betetzen dituzte sialisek. Emeak errenkadetan jartzen ditu arrautzak, landareen hostoetan, uretatik kanpo: berrehun bat aldiko. Larbek arrautza azala puskatu eta uretara jausten dira. Haragijaleak dira eta edozein motatako harrapakinez elikatzen dira. Urtebete baino gehiago, batzuetan 3 urte, behar izan ditzakete uretan erabat garatzeko. Bere gorputzaren alboetan filamentu batzuk dituzte uretako oxigenoa hartu ahal izateko. Nahikoa hazi direnean, uretatik irten eta babesleku bat bilatzen dute metamorfosiarekin jarraitzeko, pupa fasea betetzeko, alegia. Egun batzuk pasa eta gero (astebete edo) heldu hegalariak prest izango dira airea konkistatzeko.

Intsektu hauek ez dira hegaldi luzeak betetzen dituzten horietakoak, ez dute horrelako joerarik, baina bai trebeak direla arerio edo arriskuei eskin egiteko eta bat-batean desagertzeko! Hala ere, landaredian, bere kolorazioa kontuan hartuta, dezente nabarmentzen dira. Haragijaleak dira, baina ez dira jale amorratu horietakoak, ez baitute jaten sarritan.

Sialis espezie batzuk bio indikatzaile onak dira oso, larbek ur garbiak behar izaten baitituzte bertan bizi ahal izateko. Hala ere, badira degradazioa hain estu hartzen ez duten beste espezie batzuk.
Predatzaile ugari dituzte sialisek, beraz, kate trofikoan predatzaile ez ezik harrapakin modura ere aurki ditzakegu. Eta, bere zoritxarrerako, arrantzarako amu gisa ere oso preziatuak omen dira, bai bizirik edo amuzki artifizialerako modelo gisa.