Arripodasen lantzen dituen antzinako barietateak erakutsi zizkien Fran Iriarte nekazariak.

Antzinako gari barietateak berreskuratzeko eta egiteko moduari erreparatzeko, bost galdera lantzen ditu HoBBeak: zer diren gari herrikoiak; nola ekoizten dituzten; landatik ogirako bidean nola ehotzen duten; nola egiten duten ogia eta norentzat egiten duten ogia.

HoBBea proiektuaren baitan, hiru topaketa egin dituzte aurten, azkena ekainaren 13an Arripodasen.

Gari batietate zaharrak lantzen dituzte iriartetarren etxaldean

Hamarnaka lagun inguru elkartu ziren Arripodasen eta Hazialdeko elkarteko kide diren Iriarte familiaren etxaldeko gari sailak bisistatu zituzten lehenik. Iriartetarren etxaldean gari barietate zaharrekin egiten dute lan, eta tokira egokitzen direnak hautatzen dituzte. Fran Iriarte nekazariak, “Navarro 101”, “Mocho de Arroniz” eta “Rojo de Burdeos” gari barietateak ereindako sailak erakutsi zizkien, eta azalpenak eman zizkien barietate hauek agronomikoki dituzten ezaugarriez eta laborantza ekologikoko praktikez.

Gari barietate ekologikoen balio nutrizionala aztergai

Gari sailak ikusi ondoren, Arripodaseko elkartean, Lola Raigon ingeniari agronomo eta ikerlariaren solasaldia gozatu zuten. Hasteko, Raigonek egungo krisi ekosozialari erantzuteko agroekologiaren beharra nabarmendu zuen.

Baina bere hitzartzea antzinako gari barietateek eta ale osoko zereal ekologikoek duten balio nutrizionalean zentratu zen. Egindako ikerketetan oinarrituta, adierazi zuen pertsonen osasunarentzat onuragarriak diren hainbat balio dituztela, hala nola bitamina, grasa poliinsaturatu, mineralak eta abar.

Jardunaldiari bukaera eman zioten Nafarroako elikagai eta edari ekologikoz osatutako mahaiaren
bueltan solastuz eta dastatuz.

Aurreko bi topaketak

HoBBearen baitan lehen topaketa Jatsun (Behe Nafarroan) maiatzaren 17an egin zuen, Euskal Herrian hazi herrikoien karakterizazioan egiten ari diren lana ezagutzeko.

Bigarrena topaketa Gipuzkoan izan zen, ogi artisau ekologikoaren inguruan, eta begirada ezberdinetatik dituen balioak agerian jarri zituzten. Bertan elkartu ziren ogigintzako eragileak, sukaldariak, nutrizionistak eta osasungintza arloko pertsonak. Baserriko ogi ekologikoaren balio nutrizionalak aletu zituzten Christian Rémésy-k (Nutrizionista eta ogigintzan ikerlaria) eta Myriam Poussou-k (okin profesionala).

Hiru jardunaldiak oso ongi baloratu dituzte Biharko Lurraren Elkartea, Biolur eta Hazialdeko elkarteetako ekoizleek, eta adierazi dute HoBBea proiektuak balio izan diela "nekazari eta okinon jakintza partekatu eta ezagutza berria sortzeko".